અમેરિકા જવાનું સપનું જોનારાને મોટો ઝટકો
વોશિંગ્ટન, તા. 26 : અમેરિકન પ્રમુખ ડોનાલ્ડ ટ્રમ્પના બીજા કાર્યકાળમાં કડક ઇમિગ્રેશન નીતિઓ વચ્ચે વધુ એક મોટો નિર્ણય લેવામાં આવ્યો છે. અમેરિકાની સરકારે વિશ્વભરમાં વિઝા માટે અરજી કરનારા લોકોની એપોઇન્ટમેન્ટ પર હાલ પૂરતી રોક લગાવી દીધી છે. મળતી માહિતી મુજબ, અમેરિકાના વિદેશ મંત્રાલયના પ્રવક્તાએ કહ્યું કે, વિશ્વભરના તમામ અમેરિકન દૂતાવાસો અને વાણિજ્ય દૂતાવાસોમાં એક `ગ્લોબલ ટ્રેઈનિંગ પ્રોગ્રામ’ શરૂ કરાયો છે. આ ખાસ તાલીમ કાર્યક્રમને કારણે વિઝા સેવાઓની એપોઇન્ટમેન્ટ શિડયુલમાં ફેરફાર કરવામાં આવી રહ્યો છે. ડોનાલ્ડ ટ્રમ્પે દેશમાં ગેરકાયદેસર રીતે રહેતા લોકોને બહાર કાઢવા અને ઇમિગ્રેશનના નિયમો વધુ સખત બનાવવા માટે એક મોટાપાયે અભિયાન હાથ ધર્યું છે. આ કડક કાર્યવાહી અંતર્ગત ઘણા લોકોના વિઝા અને ગ્રીન કાર્ડ રદ કરવામાં આવી રહ્યા છે તેમજ તેમની અરજીઓ પણ ફગાવી દેવામાં આવી રહી છે. અરજીઓ ફગાવવા પાછળ લોકોના અંગત રાજકીય વિચારો અને ઈઝરાયલ – ગાઝા યુદ્ધ દરમિયાન પેલેસ્ટાઇનનાં સમર્થનમાં કરવામાં આવેલાં પ્રદર્શનો જેવા કારણો પણ જવાબદાર છે. એક તરફ ટ્રમ્પ સરકાર આ તમામ કડક પગલાંને દેશની આંતરિક સુરક્ષા મજબૂત કરવા માટે જરૂરી ગણાવી રહી છે, તો બીજી તરફ સરકારની આ કડક નીતિઓને કોર્ટમાં પણ પડકારવામાં આવી રહી છે. અમેરિકાના વિદેશ મંત્રાલયે આ ખાસ તાલીમ કેટલા સમય સુધી ચાલશે તે અંગે કોઈ ચોક્કસ સમયગાળો જણાવ્યો નથી, પરંતુ મંત્રાલયે સ્પષ્ટ કરતાં જણાવ્યું છે કે, આ ટ્રેઈનિંગનો મુખ્ય હેતુ દૂતાવાસના અધિકારીઓને એવા અરજદારો ઓળખવામાં મદદ કરવાનો છે, જેઓ ભવિષ્યમાં અમેરિકામાં સરકારી સહાય કે સબસિડી પર નિર્ભર થઈ શકે છે. અહેવાલો મુજબ , જે ઇમિગ્રન્ટ વિઝા અરજદારોએ અમેરિકન દૂતાવાસ અને વાણિજ્ય દૂતાવાસમાં ઇન્ટરવ્યૂ માટે અગાઉથી તારીખો બૂક કરી લીધી હતી, તેમને ઇ-મેઇલ્સ મળવાના શરૂ થઈ ગયા છે. આ મેઇલમાં તેમને જાણ કરવામાં આવી છે કે, તેમની એપોઇન્ટમેન્ટની તારીખ બદલી નાખવામાં આવી છે અને નવી તારીખ વિશે તેમને પછીથી માહિતી આપવામાં આવશે.
