ભારતીય કોસ્ટગાર્ડ અને ATSએ કચ્છના દરિયામાંથી એક પાકિસ્તાની બોટ ઝડપી, 350 કરોડના ડ્રગ્સ સાથે 6 પાકિસ્તાની ઝડપ્યા

ભારતીય કોસ્ટ ગાર્ડ (ICG)એ ATS ગુજરાત દ્વારા ગુપ્ત માહિતીના આધારે ભારતીય જળસીમામાં આશરે 06 ક્રૂ સાથે એક પાકિસ્તાની બોટને સંયુક્ત રીતે ઝડપી પાડી છે. રૂ. 350 કરોડની કિંમતની 50 કિલો હિરોઈન બોટ સાથે કબ્જે કરાઈ છે. પકડાયેલા પાકિસ્તાની ક્રુ સભ્યોને કચ્છના જખૌ બંદર મધ્યે લવાયા છે. જ્યાં આગળની કાર્યવાહી માટે પોલીસના હવાલે કરાશે.

07/08 ઑક્ટોબરની મધ્યરાત્રિ દરમિયાન, મળેલા ચોક્કસ ઇન્ટેલિજન્સ ઇનપુટના આધારે, ICGએ વ્યૂહાત્મક રીતે ઇન્ટરસેપ્ટર વર્ગના બે જહાજો, C-429 અને C-454 ને ઇન્ટરનેશનલ મેરીટાઇમ બોર્ડર લાઇન (IMBL) ની પાસેના વિસ્તારમાં પેટ્રોલિંગ માટે તૈનાત કરવામાં આવ્યા હતા. જ્યાં મધ્યરાત્રિ દરમિયાન, એક પાકિસ્તાની બોટ ભારતીય જળસીમામાં શંકાસ્પદ રીતે ફરતી જોવા મળી હતી, જે IMBLની અંદર 5 nm અને જખૌથી 40 nm (નોટિકલ માઈલ) દૂર હતી. શંકાસ્પદ બોટને પડકારવામાં આવતા, પાકિસ્તાની બોટએ છટકબારીનો દાવપેચ શરૂ કર્યો હતો. જોકે, બંને જહાજોએ પાકિસ્તાની બોટને અટકાવી અને તેને રોકવાની ફરજ પાડી હતી. ઝડપાયેલી બોટમાં સઘન તપાસ હાથ ધરાઈ હતી જે દરમિયાન પાંચ બારદાનની કોથળીઓમાં છુપાવેલ 50 કિલો માદક દ્રવ્યો, જે હિરોઈન હોવાનું માનવામાં આવે છે તે મળ્યું હતું. કબ્જે કરાયેલા નશીલા પદાર્થોની બજાર કિંમત રૂ.350 કરોડ હોવાનો અંદાજ છે. સમગ્ર ઓપરેશન દરમિયાન ICG જહાજોએ અંધારી રાત્રિ અને હવામાનની નજીવી પરિસ્થિતિમાં ખૂબ જ ખરબચડા સમુદ્રનો સામનો કરવો પડ્યો હતો.

તમામ એજન્સીઓ દ્વારા વધુ સંયુક્ત તપાસ માટે બોટને જખૌ મધ્યે લવાઇ છે. છેલ્લા એક વર્ષમાં ભારતીય કોસ્ટગાર્ડ અને એટીએસ, ગુજરાત દ્વારા આ પ્રકારનું છઠ્ઠું સંયુક્ત ઓપરેશન છે અને એક મહિના કરતાં પણ ઓછા સમયમાં આવું બીજું ઓપરેશન છે જ્યારે 14 સપ્ટેમ્બર 22ના રોજ પાકિસ્તાની બોટમાંથી 40 કિલો ડ્રગ્સ કબ્જે કરવામાં આવ્યું હતું. આવી કામગીરી સુરક્ષા એજન્સીઓ વચ્ચે અસરકારક સંકલન અને સુમેળનું પરિણામ હોવાનું એક યાદીમાં જણાવવામાં આવ્યું હતું.