બિદડા સર્વોદય ટ્રસ્ટમાં 26.80 લાખની ચોરી

વિશ્વભરમાં જાણીતા માંડવી તાલુકાના બિદડામાં આવેલા બિદડા સર્વોદય ટ્રસ્ટ સંચાલિત રતનવીર નેચર કેર ઈન્સ્ટિટયૂટ એન્ડ રિસર્ચ સેન્ટરમાં થેરાપી માટે આવેલા વૃદ્ધા પાસે રહેલા રોકડ તથા દાગીના સહિત કુલ રૂા. 26,80,000ની ચોરી થતાં  મચી ગયો હતો. ચોરીનો આ મામલો કોડાય પોલીસ મથકે ફરિયાદ નોંધાયો હતો. બનાવની જાણ થતાં માંડવી પીઆઈ સહિતનો પોલીસ કાફલો ઘટનાસ્થળે દોડી આવ્યો હતો. ફરિયાદી કાજલબેન મહેન્દ્રભાઈ વેરશીભાઈ શાહ નામના વૃદ્ધા મુંબઈથી નેચર કેર સેન્ટરમાં થેરાપી માટે આવ્યા હતા, તેમને ફાળવાયેલા રૂમમાં તેમનો સામાન પડયો હતો, ફરિયાદી રૂમને તાળું મારી બહાર ગયા હતા, દરમિયાન ગત તા. 29-7થી 2-8ના સમયગાળામાં ચોરીની આ ઘટના બની હતી. પોલીસે આપેલી વિગતો મુજબ, ચાવી કે કોઈ અન્ય સાધન વડે રૂમ ખોલીને અંદર પ્રવેશેલા ચોરે ફરિયાદીની ટ્રોલીબેગમાંથી રોકડા રૂા. 50,000 તેમજ સોના-ચાંદીના હીરાજડિત દાગીના તથા ઘડિયાળ એમ રૂા. 26,30,000 મળી કુલ રૂા. 26,80,000ની ચોરી કરી હતી. આ ચોરી કોઈ જાણભેદુએ કરી છે કે અન્ય કોઈએ તે સહિતની તપાસમાં માંડવી પીઆઈ ડી. ડી. સિમ્પી, બિદડા તથા કોડાય પોલીસ સ્ટાફ જોડાયા હતા અને આરોપીને પકડવા તજવીજ હાથ ધરી હતી.