સુરતની હોટલમાંથી 2.57 ગ્રામ એમડી ડ્રગ્સના જથ્થા સાથે એક નશામાં ધૂત શખ્સને પોલીસે ઝડપ્યો

સુરતની હોટલમાથી 2.57 ગ્રામ એમડી ડ્રગ્સના જથ્થા સાથે એક શખ્સને નશાની હાલતમાં પોલીસે ઝડપી પાડ્યો છે. આ મામલે સૂત્રો દ્વારા પ્રાપ્ત થતી વિગતો મુજબ સુરત પોલીસ દ્વારા ચલાવવામાં આવી રહેલા “નો ડ્રગ્સ ઇન સુરત સીટી” અભિયાન અંતર્ગત ડ્રગ્સના કારોબાર સાથે સંકળાયેલા તત્વોને ઝડપી પાડવા માટે પોલીસ દ્વારા અનેક પ્રયાસો કરવામાં આવી રહ્યા છે. દરમ્યાન સુરતની ખટોદરા પોલીસે બમરોલી વિસ્તારમાંથી ડ્રગ્સના જથ્થા સાથે એક આરોપીને ઝડપી પાડ્યો છે. સૂત્રો દ્વારા પ્રાપ્ત થતી વિગતો મુજબ  પોલીસની ટીમને ખાનગી રાહે બાતમી મળેલ હતી કે બમરોલી રોડ પર આવેલ ગેલેક્સી હોટેલના રૂમ નંબર ચારમાં એક શખ્સ રોકાયેલો છે. જે શખ્સ પાસે એમ.ડી. ડ્રગ્સનો જથ્થો રહેલો છે.મળેલ બાતમીના આધારે પોલીસે હકીકત વાળા સ્થળ પર દરોડો પાડી આરોપી શખ્સને રંગે હાથ ઝડપી પાડેલ હતો. વધુમાં જાણવા મળી રહ્યું છે કે, આરોપી એટલો નશામાં હતો કે તેની સાથે પોલીસ કંઈ પૂછપરછ કરી શકે તેવી સ્થિતિમાં ન હતો.પરંતુ પોલીસે આ શખ્સ પાસેથી 2.57 ગ્રામ એમડી ડ્રગ્સનો જથ્થો મળી આવ્યો હતો. સંપૂર્ણ રીતે ભાનમાં આવ્યા બાદ પોલીસે આરોપીની પ્રાથમિક પૂછપરછ કરતા તેણે આ ડ્રગ્સનો જથ્થો ભાઠેણા ખાતેથી એક વ્યક્તિ પાસેથી ખરીદ્યો હોવાની હકીકત સામે આવી હતી. ઉપરાંત તેની પાસે રહેલા મોબાઈલ અને એક Activa મોપેડ ક્યાં છે તેનો પણ તેને ખ્યાલ ન હતો. જેથી પોલીસે ₹26,000 ની કિંમતના એમડી ડ્રગ્સના જથ્થા સાથે આરોપી શખ્સની અટક કરી આગળની વધુ કાર્યવાહી આરંભી છે.