રોકાણકારોને વધુ આઠ લાખ કરોડનો ધુંબો

ગુરુવારના કારોબારી સત્ર દરમિયાન ભારતીય શેરબજારમાં વધુ એકવાર ભારે તબાહી જોવા મળી હતી અને બન્ને મુખ્ય સૂચકાંક લાલ નિશાનમાં બંધ થયા હતા.સૂત્રો પરથી મળતી માહિતી આંતરરાષ્ટ્રીય સ્તરે ક્રૂડની કિંમતમાં ઉછાળો, એફઆઇઆઇની વેચવાલી અને આરબીઆઈ-અમેરિકી ફેડના સખત મૌદ્રિક સંકેતોથી બજારમાં દબાણ જોવા મળ્યું હતું. જેનાં પરિણામે સેન્સેક્સ 1045.46 ના ઘટાડા સાથે 71,593.24એ બંધ થયું હતું અને નિફ્ટી 371.25 અંક તૂટીને 22,231.80ના સ્તરે આવી હતી.  કારોબારના અંતિમ કલાકોમાં મિડકેપ અને સ્મોલકેપ શેરમાં વેચવાલીનું દબાણ સૌથી વધારે રહ્યું હતું. જેનાથી રોકાણકારોને ઝટકો મળ્યો હતો. નિફ્ટી મિડકેપમાં 1502.15 અંકનો કડાકો આવ્યો હતો અને નિફ્ટી બેન્કમાં 540.50 અંકનો ઘટાડો નોંધાયો હતો. બજારમાં આવેલા દબાણથી બીએસઇમાં લિસ્ટેડ કંપનીઓની કુલ બજાર મૂડી પણ ઘટી હતી અને દિવસ દરમિયાન રોકાણકારોના 8 લાખ કરોડ રૂપિયા ડૂબ્યા હતા.  શેરબજારમાં કડાકાના મુખ્ય ચાર કારણો રહ્યાં હતાં. જેમાં ક્રૂડની કિંમતમાં ઉછાળો, એફઆઇઆઇની  તાબડતોડ વેચવાલી, આરબીઆઈ દ્વારા રેપોરેટમાં વધારો અને આકરું વલણ તેમજ નબળાં વૈશ્વિક સંકેતની સાથે અમેરિકી ફેડ દ્વારા મોટા નિર્ણયોની આશંકા સામેલ છે.  બીએસઇમાં વિક્લી ઓપ્શન્સની એક્સપાયરીમાં સેન્સેક્ષના આ તીવ્ર ઘટાડાએ ઓપ્શન્સ રાઇટર્સને અચાનક ઝડપી ખોટના ખાડામાં ઉતારી દીધા હોવાના અહેવાલ હતા. આરબીઆઇએ વ્યાજદરમાં પા ટકાનો વધારો કર્યા પછી વ્યાજદર સંવેદનશીલ કંપનીઓના શૅરના ભાવમાં ઘટાડાથી બુધવારથી શરૂ થયેલા ઘટાડાએ એવું રૌદ્ર સ્વરૂપ ધારણ કર્યું હતું કે નિફ્ટી ફિફ્ટીનના 50 શૅરમાંથી માત્ર ત્રણ જ શૅર ઇન્ફોસીસ, ટેક મહિન્દ્ર અને એક્સીસ બૅન્ક અડધા ટકાથી પણ ઓછા વધી ગેઇનર્સની યાદીની લાજ સાચવી હતી. જોકે એનએસઇમાં સુધરનારા એક શૅર સામે છ શૅર ઘટવાના કારણે એડવાન્સ-ડિક્લાઇન રેશિયો અત્યંત ખરાબ હતો.