હિન્દુઓના અપમાન અંગે ઈઝરાયલે માફી માગી

હિન્દુ ધર્મ, ગૌપૂજા અને ભારતીય ડોક્ટરો વિશે વિવાદિત ટિપ્પણીઓ કરનારા ઈઝરાયલી-અમેરિકન રબ્બી યોસી મિઝરાહીનાં નિવેદન પર ઈઝરાયલ સરકારે કડક વલણ અપનાવ્યું છે.સૂત્રો પરથી મળતી માહિતી મધ્ય-પશ્ચિમ ભારત માટેના ઈઝરાયલી રાજદૂત યાનીવ રેવાચે મિઝરાહીના નિવેદનની આકરા શબ્દોમાં નિંદા કરી છે. તેમણે મિઝરાહીની વાતોને અત્યંત ઘૃણાસ્પદ ગણાવતાં ભારતીયો અને હિન્દુ સમુદાય સમક્ષ ઈઝરાયલ તરફથી માફી માગી છે. ઈઝરાયલી રાજદૂત યાનીવ રેવાચે સોશિયલ મીડિયા પ્લેટફોર્મ `એક્સ’ પર પોતાનો રોષ ઠાલવતાં લખ્યું કે, યોસી મિઝરાહીની હિન્દુ ધર્મ વિરુદ્ધની ઝેરી અને આપત્તિજનક વાતોથી મને ભારે ઘૃણા થઈ રહી છે. આ કટ્ટરપંથી અને હોલોકોસ્ટનો ઇન્કાર કરનારી વ્યક્તિ પોતાની અજ્ઞાનતા સિવાય અન્ય કોઈનું પ્રતિનિધિત્વ કરતી નથી. ઈઝરાયલ અને બ્રિટનના મુખ્યધારાના યહુદી સમુદાયોએ મિઝરાહીનો સંપૂર્ણ બહિષ્કાર કરેલો છે અને તેમનાથી અંતર જાળવી રાખ્યું છે. `ભારત અને ઈઝરાયલ વચ્ચેના ગાઢ સંબંધોનો ઉલ્લેખ કરતાં યાનીવ રેવાચે જણાવ્યું કે, `યહુદીઓ અને ઈઝરાયલીઓનાં મનમાં ભારત અને તેની ધાર્મિક આસ્થાઓ પ્રત્યે સન્માન છે. આ મૂર્ખ વ્યક્તિના બેજવાબદાર નિવેદનથી આપણા મજબૂત સંબંધોને પહોંચેલા નુકસાન બદલ અમે દિલથી માફી માગીએ છીએ. ઈઝરાયલી દૂતના આ નિવેદનને બંને દેશો વચ્ચેના સંબંધોની ગંભીરતા અને સમર્થનના પ્રતીક તરીકે જોવામાં આવી રહ્યું છે. ઉલ્લેખનીય છે કે, તાજેતરમાં વાયરલ થયેલા વીડિયોમાં યોસી મિઝરાહીએ ગૌપૂજાનો અનાદર કરતાં દાવો કર્યો હતો કે, ભારતમાં લોકો અને ડોક્ટરો ગૌમૂત્રનું સેવન કરે છે. આ ઉપરાંત તેમણે દિલ્હીના ટ્રાફિક અને ભારતીયોની મજાક ઉડાવી હતી. મિઝરાહી અગાઉ 2015માં હોલોકોસ્ટમાં માર્યા ગયેલા યહુદીઓના આંકડા બાબતે ખોટા દાવા કરવા બદલ, 2016માં 16 ઓર્થોડોક્સ રબ્બીઓ દ્વારા ટીકા પામવા બદલ અને 2019માં બ્રિટનમાં સભાઓ દરમિયાન પણ ભારે વિવાદોમાં ઘેરાયેલા રહ્યા છે.