ભચાઉ પાસે નર્મદા કેનાલમાંથી બિનવારસી હાલતમાં એક્ટિવા સ્કૂટર અને હેલ્મેટ મળી આવ્યું

પૂર્વ કચ્છમાં પહોંચેલી નર્મદા કેનાલના પાણીનો ઉપયોગ ખેડૂતો ખેતીમાં કરી રાજીપો અનુભવી રહ્યા છે. તો હવે અમુક લેભાગુ તત્વો તેનો દૂરઉપયોગ પણ કરતા થયા છે. જેમાં આજે ભચાઉ પાસેની કેનાલમાં કોઈ શખ્સ એક્ટિવા સ્કૂટર અને હેલ્મેટ નાખી જતાં આશ્ચર્ય ફેલાયું હતું. જો કે હાલમાં આ સ્કુટરને બહાર લાવી પોલીસને જાણ કરવામાં આવી છે.આ વિશે નગરપાલિકા કચેરીના ફાયર વિભાગમાં કોઈ રાહદારી દ્વારા ફોન મારફતે જાણ કરવામાં આવી હતી કે ભચાઉ-નવાગામ વચ્ચે છછડા તળાવ પાસેથી પસાર થતી નર્મદા કેનાલની અંદર કોઈ શખ્સ હેલ્મેટ અને એક્ટિવા સ્કૂટર નાખી ગયા છે. આથી ફાયર વિભાગના પ્રવીણ દાફડા સહિતના કર્મચારીઓએ સ્થળ પર પહોંચી એક્ટિવા બહાર લાવી પોલીસને જાણ કરી હતી. આ દ્વિ-ચક્રી વાહન કોઈ ઇસમ ચોરી કરીને અથવા કોઈ ગેર પ્રવૃત્તિમાં ઉપયોગ કર્યા બાદ ફેંકી ગયાની આશંકા લોકોએ વ્યક્ત કરી હતી