મરમઢ ગામે ટ્રેક્ટર ભાડે લઈ જઈ નાણાં ન ચૂકવી 58 હજારની ઠગાઇ

માણાવદર તાલુકાનાં મરમઢ ગામે રહેતા એક યુવાન સાથે ટ્રેક્ટરનાં ભાડાનાં પૈસાની છેતરપીંડી થતા પોલીસ ફરિયાદ લખાવાઈ છે. પોલીસે ગુનો દાખલ કરીને આગળની વધુ તજવીજ હાથ ધરી છે. આ અંગેની પોલીસમાંથી મળતી વિગત અનુસાર માણાવદરનાં મરમઢ ગામનાં હેંમતભાઈ રાજશીભાઈ વરૂએ લખાવેલી ફરિયાદ મુજબ ચિખલોદ્રા ગામે રહેતા જગુભાઈ જેઠાભાઈ ભેટારીયાએ જુદી જુદી જગ્યાએ ખેતરમાં માટી ભરવા તથા માટી, રેતી ઢાલવવાનાં કામો રાખ્યા હોય. જેમાં હેંમતભાઈનું ટ્રેક્ટર ભાડે રાખ્યું હતું. અને રૂ. 58 હજાર ભાડુ થયું હતું. અને જગુએ કામ પૂર્ણ થયા બાદ આ નાણાં ચૂકવવાનો વિશ્વાસ આપ્યો હતો. કામ પૂર્ણ થઈ ગયા છતાં અને નાણાંની ઉઘરાણી કરવા છતાં પૈસા આપ્યા ન હતા. અને ભાડાનાં પૈસા આપી દીધા હોવાનું હેંમતભાઈનાં પિતાને જણાવી પૈસાની આપવાની ના પાડી હતી. ઠગાઇ થતા હેંતમભાઈએ માણાવદર પોલીસમાં ફરિયાદ લખાવી હતી.પોલીસ આગળની વધુ તજવીજ હાથ ધરી છે.