મહેસાણાના લાખવડ રોડ પર ઢોર પકડવા ગયેલી નગરપાલિકાની ટીમ પર હુમલો, પથ્થરમારો કરી શખ્સો ફરાર
મહેસાણામાં અવારનવાર રખડતા ઢોરો વાહન ચાલકો અને રાહદારીઓને હડફેટે લેતા ઈજાઓ થવાની ઘટનાઓ સામે આવતી હોય છે. ત્યારે મહેસાણા નગરપાલિકા દ્વારા શહેરમાં ઢોર પકડવાની કામગીરી ચાલુ કરવામાં આવી ત્યારે રવિવારે સાંજે 9 કલાકે લાખવડ રોડ પરની ઋષિનગર પાસે નગરપાલિકાની ટીમ ઢોર પકડવા ગઈ એ દરમિયાન ટીમ પર બે શખ્સોએ પથ્થર મારો કરી ઈજા પહોંચાડી હોવાની ઘટના સામે આવી છે.
મહેસાણા પાલિકાની એજન્સી દ્વારા રખડતા ઢોર પકડવાની કામગીરી ચાલુ છે. ત્યારે અગાઉ પણ પાલિકાની ઢોર પકડતી એજન્સી પર ગાયો પકડવા મામલે ધમકી આપવામાં આવી હતી. તેમજ પોલીસની સાથે રખડતા ઢોર પકડવા નિર્ણય કરવામાં આવ્યો હતો. જોકે, રવિવારે મહેસાણા નગરપાલિકાની એજન્સી લાખવડ રોડ પર આવેલ ઋષિનગરમાં રખડતા ઢોર પકડવા ગઈ તે દરમિયાન રમો રબારી તથા ભીખો રબારી બાઇકો લઇ આવી જતા નગરપાલિકાની ટીમે પકડેલા ઢોરને નીચે ઉતારી નગરપાલિકાના ડ્રાઇવર સાથે બોલાચાલી કર્યા બાદ લાફા અને મારકૂટ કરી હતી. ત્યાર પછી ગયો છોડાવવા આવેલા ઈસમોએ નગરપાલિકાની ગાડીઓ પર અને કર્મીઓ પર પથ્થર મારો કર્યો હતો. તેમજ ભેગી કરેલી ગાયોને ભગાડી મૂકી હતી અને હવે આ એરિયામાં ગયો પકડવા આવ્યા છો તો “જાનથી મારી નાખીસુ” એવી ધામકીઓ આપી પોતાના વાહનો મૂકી ફરાર થઈ ગયા હતા. સમગ્ર મામલે હાલમાં મહેસાણા એ ડિવિઝન પોલીસ મથકમાં હુમલો કરનાર રબારી રમો અને રબારી ભીખા વિરુદ્ધ પોલીસ ફરિયાદ નોંધવામાં આવી છે.
