કુખ્યાત ડ્રગ ડીલર સોનુ સરદાર 4.31 લાખના હેરોઇન સાથે ઝડપાયો
પૂર્વે પોલીસના હાથમાંથી બે વાર છટકી ગયેલા શહેરના સૌથી મોટા ડ્રગ ડીલર સોનું સરદારને એસઓજીએ પકડ્યો છે. ફતેગંજ મધ્યે સામ્રાજ્ય ફ્લેટ્સના રિદ્ધિ ટાવરમાં રહેતો અમરીકસીંગ ઉર્ફે સોનું સરદાર મલ્હી ડ્રગનો ધંધો કરતો હોવાની બાતમીને આધારે ટીમે રેડ પાડતા તેના ઘરમાંથી ~4.31 લાખનું 86.2 ગ્રામ હેરોઇન મળ્યું હતું.સોનુંએ ત્રણ વર્ષથી ડ્રગના ધંધા સાથે સંડોવાયેલા હોવાનું કબૂલી સચદેવ ખાલસા મદદ કરતો હોવાનું જણાવ્યું હતું. પોલીસે આ અંગે અમરિક સિંગ ઉર્ફે સોનું સરદાર વિરુદ્ધ ફતેગંજ પોલીસ મથકમાં એનડીપીએસ એકટના ગુના નોંધ્યા છે.
સોનું સરદાર અંગે એસઓજીને લાંબા સમયથી બાતમી હતી. પરંતુ સોનુ હાથમાં આવતો હતો નહિ. પોલીસને બે વાર તેના ઘરેથી ડ્રગ મળ્યું ન હતું. સોનુએ ડ્રગ સપ્લાય કરવા 2 યુવતીઓ રાખેલી હતી. તે મોબાઈલ ઉપર સોશિયલ મીડિયાથી જ ડ્રગનો ઓર્ડર લેતો હતો અને ઓળખીતા હોય એવા બંધાણીને દર વખતે અલગ સ્થળે બોલાવી યુવતીઓ દ્વારા ડ્રગ મોકલતો હતો. તે રાધનપૂર હાઇવે પરના ધાબા પરથી ચાર વૈભવી કારોમાં ડ્રગ લાવતો હતો. તે ઘરના વોશરૂમમાં જથ્થો છુપાવીને રાખતો હતો. તેણે ઘરની આસપાસ સીસીટીવી લગાવ્યા હતા અને બારણું ખખડાવનાર શંકાસ્પદ લાગે તો સંડાસમાં ડ્રગ્સને ફલશ કરી દેતો હતો.
