ગાંધીધામ ખાતે આવેલ પડાણા નજીક આવેલા લાકડાંના એક બેન્સામાં આગની જ્વાળાઓ ફાટી નીકળતા 20 લાખના વિદેશી લાકડાં સળગીને ભસ્મ થઈ ગયાં હતાં. સદભાગ્યે આગના આ બનાવમાં કોઇ જાનહાનિ થઇ ન હોતી. સૂત્રો દ્વારા મળતી માહિતી મુજબ પડાણાના સર્વે નંબર 90માં પ્લોટ નંબર 1થી 10માં વાયબ્રન્ટ ઇમ્પેક્સ નામની લાકડાંની ફેક્ટરી આવેલ છે. આ ટિમ્બરમાં ગત તા. 22/11ના વહેલી પરોઢે અચાનક આગ ફાટી નીકળી હતી. ટિમ્બરના મેદાનમાં રહેલા આયાતી લાકડાંમાં આગ ભભૂકી ઊઠતાં કામદારોમાં દોડધામ મચી ગઈ હતી. આગના આ બનાવ અંગે અગ્નિશમન દળને જાણ કરતાં તેઓ અહીં લાયબંબા લઈ દોડી આવ્યા હતા અને આગ ઉપર કાબૂ મેળવવા પાણીનો મારો ચલાવ્યો હતો. સાડા ત્રણ કલાક સુધી પાણીનો મારો ચલાવાયા બાદ આગ ઉપર કાબૂ મેળવાયો હતો. આગના આ બનાવમાં રૂા. 20 લાખના સાગવાન, મેરન્ટી, પાઇપ વગેરે વિદેશી લાકડાં સળગી ગયા હોવાનું જાણવા મળ્યું હતું. આ બાનવ અંગે આગળની વધુ તપાસ પોલીસે હાથ ધરી છે.