ચુડવામાંથી વધુ એક રાંધણગેસના બાટલાનું કૌભાંડ ઝડપાયું

ગાંધીધામ તાલુકાના ચુડવાની સીમમાં કરિયાણાની એક દુકાનમાં પોલીસે છાપો મારી રૂ.64,400ના ઘરેલુ તથા કોમર્શિયલ ગેસના બાટલા સાથે દુકાનદારની અટક  કરી હતી. ગાંધીધામ-ભચાઉ ધોરીમાર્ગ ચુડવા સીમમાં વિનાયક કોમર્શિયલ કોમ્પલેકસમાં બાલાજી કાંટા પાસે શ્રી જીણમાતા પ્રોવિઝન સ્ટોર નામની દુકાનમાં સાંજના અરસામા  પોલીસે દોરડો પડ્યો હતો. આ દુકાનમાંથી આરોપી મુળ શિકર રાજસ્થાનના શ્રવણકુમાર ત્રિલોકરામ ચૌધરીની અટક કરવામાં આવી હતી. આ દુકાનમાંથી ઈન્ડેન કંપનીના કોમર્શિયલ ભરેલા બાટલા નંગ-18, આ જ કંપનીના કોમર્શિયલ ખાલી બાટલા નંગ-8 તથા ઈન્ડેનના ઘરેલુ ગેસના ભરેલા બાટલા નંગ-3 અને ખાલી 8 બાટલા એમ કુલ્લ રૂ.64,400ના બાટલા તથા વજનકાંટો, ગેસના  બાટલા ખાલી કરવા, ભરવા માટેનું રેગ્યુલેટર, પાઈપ વગેરે પોલીસે હસ્તગત કર્યા હતા. આ ઈસમ  જુદા-જુદા લોકો પાસેથી ભરેલા બાટલા મેળવી પોતાના ગ્રાહકોને વેંચી મારતો હતો. છેલ્લા કેટલાક સમયથી વરસામેડી, ગાંધીધામમાં આવા બાટલા ઝડપાયા છે પરંતુ આવા બાટલા ખરેખર કોણ વેંચે છે તેમાં કોણ-કોણ સંડોવાયેલા છે તે સહિતની વિગતો બહાર આવતી નથી. પોલીસ કડક અને નિતિમતાથી આ અંગે તપાસ હાથ ધરે તો આવા બનાવોમાં મોટું કૌભાંડ બહાર આવે તેમ હોવાનું સૂત્રોએ જણાવ્યું હતું. બનાવની આગળની તપાસ પોલીસે હાથ ધરી હતી.