૨૧મીથી ભુજ ખાતે Joint Entrance Examination (Main) 2026 પરીક્ષા યોજાશે
રાષ્ટ્રીય પરીક્ષા એજન્સી દ્વારા Joint Entrance Examination (Main) તા.૨૧/૦૧/૨૦૨૬થી તા.૨૯/૦૧/૨૦૨૬ દરમિયાન યોજાનાર છે.
આ પરીક્ષા દરમિયાન પરીક્ષા કેન્દ્રના સ્થળ તથા અધિક જિલ્લા મેજિસ્ટ્રેટશ્રી દ્વારા તેની આજુબાજુના વિસ્તારમાં કાયદો અને વ્યવસ્થા જળવાઈ રહે માટે પ્રતિબંધાત્મક હુકમો જારી કરાયા છે.
જિલ્લામાં આ પરીક્ષા, પરીક્ષાર્થીઓ અસામાજિક તત્વોના ત્રાસ અને ભય વિના આપી શકે તેમજ પરીક્ષા સ્થળના સંચાલકશ્રીઓ અસામાજિક તત્વોના ત્રાસ અને ભય વિના જાહેર પરીક્ષાનું સંચાલન કરી શકે તેમજ પરીક્ષા સમય દરમિયાન જાહેર વ્યવસ્થા જળવાઇ રહે અને કોઇ અનિચ્છનીય બનાવ બનવા ન પામે તે હેતુથી તથા પરીક્ષા દરમિયાન ચોરીના દૂષણના કારણે તેજસ્વી પરીક્ષાર્થીઓના ભાવિ પર અસર ન પડે તે માટે કોપી રાઇટ/ડુપ્લીકેટ પ્રશ્ન પત્રો કે તેના ઉતરો કોપીઈંગ મશીન દ્વારા ન થાય તથા પરીક્ષા ખંડમાં ન પહોંચે તે માટે પ્રતિબંધિત પગલાં લેવા માટે ઈ.ચાર્જ. અધિક જિલ્લા મેજિસ્ટ્રેટશ્રી નિકુંજ પરીખ, કચ્છ-ભુજ દ્વારા ભારતીય નાગરિક સુરક્ષા સંહિતા- ૨૦૨૩ ની કલમ ૧૬૩ મુજબ પ્રતિબંધ ફરમાવેલ છે. જેમાં આ પ્રતિબંધો પરીક્ષા કેન્દ્રો તથા બિલ્ડીંગના ૨૦૦ મીટર ત્રિજ્યાના વિસ્તારમાં તા.૨૧/૦૧/૨૦૨૬ના સવારના ૬ કલાકથી તા.૨૯/૦૧/૨૦૨૬ના રાત્રીના ૮ વાગ્યા સુધી અમલમાં રહેશે.
જાહેરનામા મુજબ ડિપાર્ટમેન્ટ ઓફ કોમ્પ્યુટર સાયન્સ, ક્રાંતિગુરૂ શ્યામજી કૃષ્ણવર્મા કચ્છ યુનિવર્સિટી, ભજ યુનિવર્સિટી કેમ્પસ, મુન્દ્રા રોડ, ભુજ પરીક્ષા કેન્દ્રની આસપાસ ૨૦૦ મીટરની ત્રિજ્યાના વિસ્તારમાં કોઇપણ માર્ગ ઉપર ચોકમાં કે ગલીમાં પાંચ કરતા વધારે લોકોએ એકઠા થવું નહીં, સરઘસો કાઢવા નહીં તેમજ સૂત્રો પોકારવા નહીં. પરીક્ષા કેન્દ્રોની આસપાસના ૨૦૦ મીટરની ત્રિજ્યાના વિસ્તારમાં કોપીઈંગ મશીન દ્વારા કોપીઓ કરવાનો વ્યવસાય કરતા ધંધાર્થીઓ/કોપીઈંગ મશીન ધારકોએ તેઓના કોપીઈંગ મશીનો ચલાવવા નહીં કે કોઇપણ પત્રો, દસ્તાવેજો કે કાગળોની નકલો કરવી નહીં અને મશીનો બંધ રાખવા.
પરીક્ષા કેન્દ્રો/બિલ્ડીંગોના મુખ્ય પ્રવેશદ્વાર પાસે જ પોલીસ કર્મચારીઓ ઉભા રહી જે પરીક્ષાર્થી પાસે પ્રવેશિકા (રસીદ) હોય તે ચકાસીને જ પરીક્ષાર્થીને પ્રવેશ આપવાનો રહેશે. પરીક્ષામાં રોકાયેલા કેન્દ્રોના સંપાદકશ્રીઓ, બિલ્ડીંગના કન્ડકટરશ્રી, ખંડ નિરીક્ષકો, વહીવટી સેવામાં જેઓને ફરજ સોંપવામાં આવે છે તે વોટરમેન, બેલમેન કે જેઓને આયોગ દ્વારા ઓળખપત્ર આપવામાં આવેલ છે તે તપાસીને પ્રવેશ આપવાનો રહેશે.પોલીસ કર્મચારીએ પરીક્ષા કેન્દ્ર/બિલ્ડીંગના મુખ્ય પ્રવેશદ્વાર પાસે જ ફરજ બજાવવાની રહેશે. વર્ગખંડમાં પ્રવેશ કરવાનો રહેશે નહીં અને પરીક્ષા કેન્દ્રની આસપાસ ૨૦૦ મીટરની ત્રિજ્યાના વિસ્તારમાં કોઇપણ માર્ગ ઉપર ચોકમાં, ગલીમાં કોઇપણ વ્યક્તિએ વાયરલેસ ડીવાઇસીસ જેવા કે બ્લુટૂથ, પેન કેમેરા, મોબાઇલ કે ઈન્ટરનેટ સાથે કનેક્ટેડ ઉપકરણો કે અન્ય કોઇપણ ઈલેકટ્રોનિકસ સાધનો લઇ જવા નહીં તથા મ્યૂઝિક, સંગીત ઈત્યાદી જોરથી વગાડવું નહીં.
આ હુકમ અન્વયે પોતાના અંગત ઉપયોગ માટે કોપીઈંગ મશીનનો વપરાશ કરતી વ્યક્તિઓને, પોતાની ફરજની રૂએ કામ કરતી વ્યક્તિને એકત્રિત થવાની જોગવાઇ લાગુ પડશે નહીં. આ હુકમનો ભંગ કરનાર વ્યક્તિ ભારતીય ન્યાય સંહિતા-૨૦૨૩ની કલમ-૨૨૩ મુજબ શિક્ષાને પાત્ર થશે.
