હોર્મુઝ બાદ હવે રાતા સમુદ્રમાં પણ ખતરો, 10-12 લોકોના હથિયારબંધ સમૂહે જહાજ ઘેર્યું

મિડલ ઈસ્ટમાં સ્થિતિ વધુ ચિંતાજનક બની રહી છે. રાતા સમુદ્ર અને હોર્મુઝમાં જહાજો પર થઈ રહેલા હુમલાઓએ વૈશ્વિક દરિયાઈ વેપાર માટે મોટું સંકટ ઊભું કર્યું છે. તાજેતરના અહેવાલો અનુસાર , ઈરાને કડક ચેતવણી આપી છે કે જો તેની સરહદો અથવા હિતોને નુકસાન પહોંચાડવામાં આવશે, તો તે આ મહત્ત્વપૂર્ણ જળમાર્ગો પર નિયંત્રણ મેળવી શકે છે. મિડલ ઈસ્ટમાં તણાવ હવે ખતરનાક સ્થિતિએ પહોંચી રહ્યો છે. એક તરફ અમેરિકા હોર્મુઝમાં નાકાબંધી કરવા જઈ રહ્યું છે, બીજી તરફ રાતા સમુદ્રમાં પણ જહાજો પર ખતરો મંડરાઈ રહ્યો છે. રવિવારે યુનાઈટેડ કિંગડમ મેરિટાઈમ ટ્રેડ ઓપરેશન્સના અનુસાર, યમનના અલ હુદૈદા કિનારાથી અંદાજિત 54 નોટિકલ માઈલ દૂર એક જહાજને 10-12 લોકોના હથિયારબંધ સમૂહે ઘેરી લીધું. જેમાંથી 4-5 લોકો ઓટોમેટિક હથિયારોથી સજ્જ હતા. હુમલાખોરોએ જહાજને રોકવાના આદેશ આપ્યા, પરંતુ કેપ્ટને માનવાની ના પાડી દીધી. ત્યારબાદ હુમલાખોરોનું જહાજ નજીક આવ્યું અને તેના જહાજ પર ચઢવાનો પ્રયાસ કર્યો. સ્થિતિ ખૂબ જ તણાવપૂર્ણ થઈ ગઈ હતી, પરંતુ કેપ્ટનની સૂઝબૂઝથી મોટી દુર્ઘટના ટળી ગઈ. જહાજ પરથી ફ્લેયર છોડવામાં આવ્યા, જ્યારબાદ હુમલાખોરોએ પીછેહટ કરી અને દક્ષિણ-પૂર્વ દિશામાં નાસી ગયા. આ ઘટનામાં કોઈ ઘાયલ નથી થયું, પરંતુ એ સ્પષ્ટ થઈ ગયું છે કે રાતા સમુદ્રમાં સતત ખતરો વધી રહ્યો છે.

ઈરાને આપી ચેતવણી : IRGCએ ચેતવણી આપી છે કે, જો કોઈ સૈન્ય જહાજ આ વિસ્તારમાં ઘુસવાનો પ્રયાસ કરશે, તો તેને યુદ્ધવિરામનું ઉલ્લંઘન મનાશે અને આકરી કાર્યવાહી કરવામાં આવશે. ઈરાને એ પણ દાવો કર્યો કે અમેરિકાના યુદ્ધ જહાજોને પીછે હટવા પર મજબૂર કરાયા, પરંતુ અમેરિકાએ પહેલા જણાવ્યું હતું કે, તેમના જહાજોને હોર્મુઝથી પસાર થતા માર્ગમાં બારૂદી સુરંગો હટાવવાનું અભિયાન શરૂ કર્યું છે. આ સંપૂર્ણ તણાવ એવા સમયે વધ્યો છે, જ્યારે અમેરિકા અને ઈરાન વચ્ચે શાંતિ વાટાઘાટો નિષ્ફળ રહી ચૂકી છે.વર્તમાન પરિસ્થિતિ જોતા પશ્ચિમ એશિયામાં ગમે ત્યારે મોટો વિસ્ફોટ થઈ શકે તેમ છે. આ માત્ર પ્રાદેશિક સુરક્ષાનો મુદ્દો નથી, પરંતુ સમગ્ર વિશ્વના અર્થતંત્રને અસર કરતું ગંભીર સંકટ છે.