રાપર તાલુકાના આડેસર ગામે ગોકુલ હોટલ નજીક આજે સવારે ૯ વાગ્યાના અરસામાં ત્રીપલ અકસ્માત સર્જાયો હતો. જેમાં ટેન્કરના કલીનરનું ઘટના સ્થળે મોત નીપજ્યું હતું. ઓઈલ ટેન્કર, સ્કોર્પીયો કાર અને બાઈક વચ્ચે અકસ્માતમાં ઘવાયેલા લોકોને સારવાર માટે રાધનપુરની હોસ્પિટલમાં લઈ જવાયા હતા.બનાવ અગે જાણવા મળતી વિગતો મુજબ, ગાંધીધામથી નીકળેલું ઓઈલ ભરેલું ટેન્કર પાટણ તરફ જતું હતું ત્યારે આડેસર નજીક હાઈવે નં. ર૭ પર અકસ્માતનો બનાવ બનવા પામ્યો હતો.સ્થાનીકોના જણાવ્યા પ્રમાણે ટેન્કર અને સ્કોર્પીયો કાર વચ્ચે ટક્કર થતા બંને વાહનો પલ્ટી મારી ગયા હતા તો બાઈક ચાલક પણ અકસ્માતની ઝપટેમાં આવી ગયો હતો. ટેન્કર પલટી મારી જતા ઓઈલ રોડ પર ઢોળાઈ ગયું હતું. જેથી માર્ગ ચીકણો બની ગયો હતો, પોલીસ મથકેથી પ્રાપ્ત વિગતો મુજબ, બનાવમાં ટ્રકના કલીનર મજીદભાઈ કમલકાન(ઉ.વ.૨૫) નું મોત નીપજ્યું છે. હતભાગી રાજસ્થાનના બારમેડ જિલ્લાના ચોહટન તાલુકાના બુરાંગસણ ગામના વતની હોવાનું જાણવા મળ્યું છે. હતભાગીની લાશને પલાસવા પીએસસીમાં પીએમ રીપોર્ટ માટે મોકલી અપાઈ હતી. અકસ્માતના બનાવમાં બાઈક ચાલક, સ્કોપીર્યોમાં સવાર લોકોને નાની-મોટી ઈજાઓ પહોચતા રાધનપુરની હોસ્પિટલમાં લઈ જવાયા છે.
