કોરોના રોગચાળાને અનુલક્ષીને કચ્છમાં 31 માર્ચ સુધી ચા-નાસ્તાની રેંકડીઓ, હોટેલ-રેસ્ટોરન્ટ, પાન-તમાકુના ગલ્લા પર પ્રતિબંધ મૂકાયો છે. લૉકડાઉન હેઠળ રીક્ષા, છકડા, જીપો, ખાનગી બસો વગેરે પેસેન્જર વાહનો પર પ્રતિબંધ મુકાયો છે.તેમ છતાં સરકારી જાહેરનામાની ઐસીતૈસી કરીને અમુક લોકોએ ધરાર વેપાર-ધંધા ચાલું કરતાં પોલીસે કાયદાનો દંડો ઉગામી દસ જણાં સામે જાહેરનામા ભંગના ગુના દાખલ કરી તેમને ‘અંદર’ કરી દીધા છે.ભુજ શહેરમાં એ અને બી ડિવિઝન પોલીસે ચાર દુકાનદારો, ગઢશીશા પોલીસે પાંચ દુકાનદારો અને મુંદરા પોલીસે એક છકડાચાલક સામે જાહેરનામા ભંગ બદલ ગુનો દાખલ કરી તેમને અંદર કરી દીધાં છે. ભુજમાં સ્ટેશન રોડ પર સ્ટેટ બેન્ક સામે આવેલા ‘બડા સા’બ શોપીંગ’ નામના શૉરૂમના સંચાલક જીગર ખીમજી મહેતા, તેની બાજુમાં આવેલી ‘જીઓ ડિજિટલ લાઈફ’ નામની દુકાનના કર્મચારી કમલેશ કાનજી બારોટ, ભુજના ભીડ બજારમાં અગરબત્તીના દુકાનદાર ભવ્ય અરવિંદ મહેતા, મટનશોપના માલિક તાહિર હસન ખલીફા સામે એ અને બી ડિવિઝન પોલીસે ગુના નોંધ્યાં છે. તો, ગઢશીશામાં પોલીસે કિસાન ચોકડી પાસે ચાની રેંકડી ચાલું કરનારાં નંધાભાઈ ખીમાભાઈ રબારી, મઉં ચોકડી પાસે કરુણા પ્લાયવુડ નામની હાર્ડવેર-પ્લાયવુડના દુકાનદાર જગદીશ શામજી ભગત, લુડવા ગામે ચીકન શોપ ચાલુ કરનારાં અબ્દુલ કાદર અલીસા સૈયદ, ભેરૈયા ગામે આઈસકેન્ડી-ઠંડા પીણાંના દુકાનદાર પચાણ રામજી બુચીયા અને દરશડીમાં એસ્સાર પેટ્રોલપમ્પ પાસેના ટી-સ્ટોલધારક ઈસ્માઈલ અબ્દુલ્લા વર્યા સામે જાહેરનામા ભંગ બદલ આઈપીસી 188 હેઠળ ગુના નોંધ્યાં છે. મુંદરામાં પોલીસે જાહેરનામાનો ભંગ કરી છકડો ચલાવતાં એક શખ્સ સામે ગુનો નોંધી વાહન ડીટેઈન કર્યું હતું.ટ્રાફિક પોલીસે માર્ગો પર ઉતરીને સમગ્ર પશ્ચિમ કચ્છમાં ઑટોરીક્ષા, છકડા, તૂફાન જીપ જેવા 62 વાહનો અને મોટર સાયકલ, દ્વિચક્રી જેવા 26 મળી કુલ 88 વાહનો મોટર વેહિકલ એક્ટની કલમ 207 હેઠળ ડીટેઈન કર્યાં છે.જાહેરનામા સંદર્ભે ગાંધીધામમાં પણ સીટી ટ્રાફિક પોલીસ સવારથી માર્ગો પર ઉતરી પડી હતી. સીટી ટ્રાફિક પોલીસે દિવસભર ઝુંબેશ છેડીને 25 છકડા રીક્ષા, 01 મીની બસ અને 5 દ્વિચક્રી મળી કુલ 31 વાહન ડીટેઈન કર્યાં છે. દરમિયાન, સરદાર વલ્લભભાઈના પૂતળાં નજીક મીની ટેમ્પો લઈને નીકળેલાં ચાલક પાસે લાયસન્સ ના હોઈ પોલીસે 500 રૂપિયા સ્થળદંડ ભરવા જણાવ્યું હતું. ચાલક દિનેશ વેરશી મહેશ્વરીએ ફોન કરી ટેમ્પોમાલિક રવિલાલ સામત દનીચાને સ્થળ પર બોલાવ્યો હતો. લાલ રંગની એસ્ટા કાર લઈ સ્થળ પર ધસી આવેલા રવિલાલે પોલીસ સાથે ‘શેનો દંડ ભરવાનો? તેમ કહી ઉગ્ર સ્વરે બોલાચાલી કરી હતી. ટેમ્પો ડ્રાઈવર દિનેશ મહેશ્વરી અને તેમાં સવાર હરેશ દેવશી સુંઢાએ પણ રવિલાલની તરફેણમાં પોલીસ જોડે બોલાચાલી કરી હતી. એક તબક્કે આરોપીઓ પોલીસ જોડે ઝપાઝપી પર ઉતરી આવ્યાં હતા. ‘મારો મિત્ર વકીલ છે, તમામને જોઈ લઈશ અહીં કેમ નોકરી કરો છો?’ તેમ કહી રવિલાલે પોલીસને ધમકી આપી હતી. જેથી ટ્રાફિક પોલીસે ત્રણેયને સરકારી વાહનમાં એ ડિવિઝન પોલીસ મથકે લાવી ફરજમાં અડચણ ઉભી કરવાનો અને ધમકી આપવાની ફરિયાદ નોંધાવી હતી.
