ગાંધીધામમાં કપડાના ગોડાઉનમાં આગ લાગતા લાખોનું નુકસાન

કચ્છના આર્થિક પાટનગર ગાંધીધામ શહેરમાં આગજનીના બનાવો સતત સામે આવી રહ્યા છે ત્યારે શહેરના જીઆઇડીસી વિસ્તારમાં આવેલા કપડાના ગોડાઉનમાં સંભવિત શોર્ટ સર્કિટના લીધે વિકરાળ આગ ફાટી નીકળતા અફરાતફરી ફેલાઈ જવા પામી હતી. ગત ગુરુવારે સાંજે લાગેલી આગને કાબુમાં લેવા ફાયર ફાયટરની ટીમ ઘટનાસ્થળે ધસી જઈ, દાવાનળને ઠારવા મોડી રાત્રી સુધી જહેમત ઉઠાવી હતી. ગાંધીધામના જીઆઇડીસી પ્લોટ ન.75માં શર્ટ સર્કિટના કારણે કપડાના ગોડાઉનમાં આગ લાગવાથી કાપડનું કિંમતી રો મટીરિયલ બળીને રાખ બની જતાં લાખો રૂપિયાનું નુકશાન થવાની સંભાવના દર્શાવાઇ રહી છે. આગ એટલી વિકરાળ હતી કે સુધારાઈના બે ફાયર ફાઇટર મોડી રાત સુધી પાણીનો મારો ચલાવી રહ્યા હોવા છતાં માંડ આગ કાબુમાં આવી હતી. આગની જ્વાળાઓ દૂર દૂર સુધી દેખાતાં આસપાસના વિસ્તારમાં અફરાતફરીનો માહોલ ખડો થવા પામ્યો હતો.