ટ્રાન્સપોર્ટના પાર્કિંગમાં ટ્રકમાં સુતેલા ડ્રાઇવર કન્ડકટરના મોબાઇલ, રોકડની તસ્કરી કરનાર પકડાયો

ટ્રાન્સપોર્ટના પાર્કિંગમાં ટ્રકમાં સુતેલા ડ્રાઇવર કન્ડકટરના મોબાઇલ, રોકડની તસ્કરી કરનાર ઈસમને એલસીબીએ પકડી પાડી 69,200નો મુદ્દામાલ જપ્ત કર્યો છે. આ અંગે મળતી વિગત અનુસાર જૂનાગઢ-રાજકોટ હાઇવે પર આવેલ પટેલ ટ્રાન્સપોર્ટના પાર્કિંગમાં ટ્રક પાર્ક કરી કેટલાક ડ્રાઇવર, કન્ડકટરો સૂતા હતા. ત્યારે ઈસમએ જૂદા જૂદા ટ્રકોના દરવાજા તોડી ડ્રાઇવર, કન્ડકટરના રોકડા 27,500 તેમજ 5 મોબાઇલ કિંમત 54,200ના મળી કુલ 81,700ના મુદ્દામાલની તસ્કરી કરી હતી.આ મામલે શરદભાઇ ખીમજીભાઇ વઘાસીયાએ ફરિયાદ લખાવી હતી. દરમિયાન તસ્કરીના ઈસમને પકડી પાડવા રેન્જ આઇજીપી મનિન્દર પ્રતાપસિંહ પવાર, એસપી રવિ તેજા વાસમ શેટ્ટીની સૂચના બાદ એલસીબીએ તપાસ હાથ ધરી હતી. ત્યારે સીસીટીવી ફૂટેજ તેમજ ટેક્નિકલ સોર્સના આધારે તપાસ કરતા આ ચોરીમાંધોરાજી તાલુકાના મોટી મારડના કાસમ જૂમાભાઇ ડફેરની સંડોવણી ખુલી હતી. બાદમાં આરોપી ધોરાજી ચોકડી તરફ હોવાની બાતમી મળતા એલસીબી ઇન્ચાર્જ પીઆઇ એચ.આઇ. ભાટી, પીએસઆઇ ડી.જી. બડવા અને સ્ટાફે તેને પકડી પાડ્યો હતો. ઈસમ પાસેથી રોકડા 25,000 તેમજ 4 મોબાઇલ કિંમત રૂ.44,200 મળી કુલ 69,200ના મુદ્દામાલ જપ્ત કરી ઈસમને તાલુકા પોલીસ સ્ટેશન હવાલે કર્યો છે.