દસ્ક્રોઇ તાલુકાનાં ગોતાની ફાર્મા કંપનીમાં ભીષણ આગ ભબુકી, ફાયર બ્રિગેડ દ્વારા ત્રણ કલાકે આગ કાબૂમાં લેવાઇ

ગોતા બ્રિજ પાસેની ડીએફ ફાર્મસીમાં વહેલી સવારે એકાએક આગ ફાટી નીકળતાં ફાયર બ્રિગેડની આઠ ગાડી ઘટના સ્થળે પહોંચી ત્રણ કલાકની જહેમત બાદ આગ પર કાબૂ મેળવ્યો. કંપનીમાં આગ લાગવાનું કારણ ફાયર બ્રિગેડને જાણવા મળ્યું ન હતું. જો કે, આ આગમાં કોઈ જાનહાનિ કે કોઈને ગંભીર ઈજા થવા પામી ન હતી.

ગોતા બ્રિજ પાસેની ડીએફ ફાર્મસીમાં વહેલી સવારે અચાનક લાગેલી આગની જાણ કંપનીમાં કાર્યરત કર્મચારીઓને જાણ થતાં કંપનીમાંથી બહાર નીકડી ગયા હતા. કર્મચારીઓએ તાત્કાલિક ફાયર બ્રિગેડને ફોન કરી જાણ હતી. જેથી ફાયર બ્રિગેડની ચાર ગાડીઓ ઘટના સ્થળે પહોંચી. ફાયર બ્રિગેડના જવાનોએ પાણીનો મારો ચલાવી આગ પર કાબૂ મેળવ્યો હતો.

જો કે જે સ્થળે આગ લાગી તે સ્થળે પડેલું એક બાઈક આગની ઝપેટમાં આવી જતાં તે બળીને ખાખ થઈ ગયું હતું. આખી કંપનીમાં આગ ના ફેલાય તે માટે વધુ ચાર ગાડી ઘટના સ્થળે પહોંચી. ફાયર બ્રિગેડની ટીમે ત્રણ કલાકની જહેમત બાદ આગ પર કાબૂ મેળવ્યો હતો. બાદમાં આગ લાગવાના કારણની તપાસ કરતાં આગ લાગવાનું ચોક્કસ કારણ જાણવા મળ્યું ન હતું. પરંતુ કંપનીમાં પ્લાસ્ટિકની બોટલો, લિક્વિડ, ડિટર્જન્ટ, વાયર, ક્લિનિક પ્રોડ્ક્ટ વગેરે.. હતાં તે બળીને ખાખ થઈ ગયા હતાં. આ દુર્ઘટનામાં સદભાગ્યે જાનહાનિ કે કોઈને ઈજા થઈ ન હતી.