વિસનગર તાલુકાનો ભાન્ડુ રેલવે ઓવરબ્રિજ લોકાપર્ણના સાડા ત્રણ મહિનામાં 2 સ્થળે બેસી ગયો
વિસનગર તાલુકાના ભાન્ડુ ગામથી વાલમ અને વિસનગર તરફ આવવા માટે બનાવવામાં આવેલ ઓવરબ્રિજનો એક સાઇડના ભાગમાં રોડ બેસી ગયો છે. સાડા ત્રણ મહિના પહેલા રેલ રાજ્યમંત્રીના હસ્તે આ ઓવરબ્રિજનું ઉદઘાટન કરવામાં આવ્યું હતું અને થોડા જ મહિનામાં એક સાઇડનો રોડ બેસી જતાં કરોડોના ખર્ચે બનાવેલા ઓવરબ્રિજના રોડના કામમાં વેઠ ઉતારીહોવાનું સ્થાનિકો જણાવી રહ્યા છે
આ ઓવરબ્રિજનું ગત 13 મે 2022ના રોજ રેલવે રાજ્ય મંત્રી દર્શનાબેન જરદોશના હસ્તે ઉદઘાટન કરાયું હતું. જેના થોડા જ મહિના પછી ઓવરબ્રિજ ઉપર પસાર થતા રોડના એક સાઇડના ભાગમાં રોડ બેસી જતાં સ્થાનિક લોકોમાં રોષની લાગણી ફેલાઈ હતી.
સ્થાનિકોના જણાવ્યા અનુસાર, આ ઓવરબ્રિજના નીચે જ શાળાએ જવાનો રસ્તો છે, કંઈ મોટું નુકસાન થાય તો નીચેથી પસાર થતાં વિદ્યાર્થીઓ અને રાહદારીઓ માટે જોખમી સાબિત થવાની શક્યતા રહે છે. જેથી આ રોડનું સમારકામ જલ્દી કરવું જરૂરી છે. ઉપરાંત, કરોડોના ખર્ચે બનાવેલ આ ઓવરબ્રિજના કામમાં ગેરરીતિ થવાનો આરોપ કરી કોન્ટ્રાક્ટર વિરુદ્ધ કાર્યવાહી કરવાની માંગણી પણ વિસ્તારના લોકો દ્વારા કરવામાં આવે છે.
