લક્કી ગામના યુવાનો ભેંસ શોધવાના બહાનાથી હેરોઇન લઈ આવ્યા, 190 કરોડના કેફીદ્રવ્યના મામલામાં અત્યાર સુધીમાં 6ની અટકાયત
પાકિસ્તાનથી બોટમાં ડ્રગ્સ આવ્યું અને તે બુદ્ધુબંદરે ઉતારાયુ ત્યાંથી બે લોકોએ કબ્જો મેળવી ટ્રક વડે પંજાબ મોકલ્યું.ચકચારી રહેલા આ ડ્રગ્સ કેસમાં આરોપીઓની ધરપકડ થયા પછી એક પછી એક નવા ખુલાસા થાય છે ત્યારે સાતમ-આઠમના દિવસે આ માલ આવ્યો હોવાનું માનવામાં આવે છે.
એકબાજુ એજન્સીઓ આ કેસમાં માત્ર તપાસનું રટણ કરે છે ત્યારે સુત્રોએ વિગત આપતા જણાવ્યું કે,પાકિસ્તાનથી બોટ વડે આ માલ સાતમ-આઠમના દિવસોમાં આવ્યો હતો તે સમયે લક્કી ગામના બે યુવાનો પોતાની ભેંસ ખોવાઈ ગઈ હોવાનું કહી આ સરહદી વિસ્તારમાં ગયા હતા અને પહેલાથી નક્કી કરેલા પ્લાન અનુસાર બુદ્ધુબંદર અને પીરજાપીર વચ્ચેના દરિયામાંથી માલ મેળવી લીધો.કોથળામાં રહેલું આ 190 કરોડનું 38 કિલો હેરોઇન ટ્રક વડે પંજાબ મોકલવાના કામ પેટે રૂ.90 હજાર મળ્યા હતા.
આ કેસમાં લક્કીના 2 ઇસમો સહિત તાજેતરમાં વધુ એકની અટકાયત કરવામાં આવી.આ સિવાય પહેલા ટ્રકનો ડ્રાઇવર અને ક્લીનર તેમજ સ્થાનિકમાં મદદગારી કરનારની ઘરપકડ થઈ એમ કુલ ધરપકડનો આંક 6 થયો છે. જોકે મહત્વની વાત એ છે કે,પાકિસ્તાનથી બોટમાં માલ આવે અને અહીંથી બે લોકો આ ડ્રગ્સ છેક પંજાબ પહોંચાડે ત્યાં સુધીમાં કોઈ એજન્સીને ભનક ન થઈ તે સુરક્ષામાં પણ ગંભીર ચેડાં દર્શાવે છે.સુરક્ષામાં રહી ગયેલી ખામીના લીધે વાયા કચ્છ થઈ પંજાબ સુધી આ માલ પહોંચી ગયો હતો.
