KBC ના નામે પાકિસ્તાની નંબર પરથી આવતા મેસેજોમાં વધારો
કચ્છમાં છેલ્લા ઘણા સમયથી ઠગાઈના બનાવોમાં વધારો થઈ રહ્યુંછે તેમાં પણ કોન બનેગા કરોડપતિના નામે પાકિસ્તાનના મોબાઈલ નંબર પરથી ફોટા અને વિડિઓવાળા મેસેજ લોકોના મોબાઈલમાં આવી રહ્યા છે તેનું પ્રમાણ હાલમાં ઘણું વધ્યું છે.પાકિસ્તાનના મોબાઈલ નંબર પરથી લોકોને મેસેજ આવી રહ્યા છે જે ફોટા અને વિડિઓમાં તમે લક્કી વિનર છો અને તમે કોન બનેગા કરોડપતિમાં જીત્યા છો તેવું કહીને રજિસ્ટ્રેશન કરવા માટે જણાવવામા આવે છે.જોકે આ ફ્રોડ મેસેજ છે જેનાથી લોકોએ સાવધાન રહેવું જરૂરી છે. અજાણ્યા નંબર પરથી આવતા આ મેસેજના કારણે છેતરપીંડી થવાનો ભય વધતો જાય છે.
જેથી ઘણા લોકો તો આ નંબર જ બ્લોકમાં નાખી દે છે અથવા તો મેસેજ ડીલિટ કરી નાખે છે પણ મહિના પૂર્વે આવી રીતે કોડાય પુલ પાસે પાણીપુરીનો ધંધાર્થી છેતરાઈ ગયો હતો.પશ્ચિમ કચ્છ સાયબર ક્રાઈમ પોલીસના PI એસ.એન.ચુડાસમાએ જણાવ્યું કે, લોટરી માટે ફોન કે મેસેજ આવે તો નાગરિકો હેલ્પલાઇન નંબર 1930 પર સંપર્ક કરી શકે છે. આ સિવાય અજાણી લિંક પર ક્લિક કરતા પહેલા અથવા મેસેજ કે અન્ય માધ્યમ દ્વારા આવેલ ફાઇલને ખોલતા પહેલા હંમેશા બે વાર વિચારો તેમજ અજાણ્યા નંબર પરથી આવતા ફોન/વિડીયો કોલ ની અવગણના કરો. બેંક કે ક્રેડીટ/ડેબીટ કાર્ડને લગતી માહીતી કોઇ સાથે શેર ના કરો. જો કંઇપણ શંકાસ્પદ જણાય તો જાણ કરવા અપીલ કરી હતી.
