ભચાઉ પાસે ડમ્પરનું હાઇડ્રો વીજ તારને અડી જતાં યુવાનનું મોત નીપજયું

ભચાઉ નજીક રેતી ખાલી કરી ડમ્પર ચાલક આગળ લઇ રહ્યો હતો તે દરમિયાન જ ક્લીનર ડમ્પરમાં ચડવા ગયો પણ હાઇડ્રોલિક ઉપર વીજ તારને અડી જતાં વીજશોક લાગવાના કારણે તેનું મોત નિપજ્યું હોવાની તા.26/9 ના બનેલી ઘટના હવે પોલીસ ચોપડે દાખલ કરાઇ હતી. નાની ચીરઇ સોસાયટીવાસમાં રહેતા 43 વર્ષીય કરીમાબાઇ સુલેમાનભાઇ નસીબભાઇ જતે દાખલ કરાવેલ ફરિયાદમાં જણાવ્યું હતું કે, તેઓ પતિ અને ચાર પુત્ર સાથે બન્ની વિસ્તારમાં ભેંસ લઇને ગયા હતા. તેમનો મોટો પુત્ર ઇબ્રાહિમ ઉર્ફે ઇબ્રાઇમ જે શ્રી ક્રિષ્ના સપ્લાયર્સમાં ક્લીનર તરીકે કામ કરતો હતો.

તા.26/9 ના રોજ તેમના કરીમાબાઇના જેઠ ઉમરભાઇએ ફોન કરી તેમના પતિને જાણ કરી હતી કે ઇબ્રાહિમ ડમ્પર ભરી ભચાઉ ગયો હતો ત્યાં અંબિકાનગર શ્રવણ કાવડીયા નજીક હાઇડ્રોલિક ઉંચું કરી રેતી ખાલી કર્યા પછી ડમ્પર ચાલક મુસાભાઇ ઉમરભાઇ જત ડમ્પર આગળ લઇ રહ્યા હતા તે સમયે ઇબ્રાહિમ ડમ્પર ઉપર ચડવા જઇ રહ્યો હતો ત્યારે હાઇડ્રોલિક ઉપર વીજ તારને અડી જતાં વીજ શોક લાગતાં તેનું મોત થયું હતું.