ભુજના હોસ્પિટલ રોડ પરથી ધોળા દિવસે યુવકનું અપહરણ કરાતાં ભારે ચકચાર મચી

હાલ વિધાનસભાની ચૂંટણી નજીક હોવાટી આચારસંહિતા અમલવારી મુકાઇ છે તેવા સમયે અપહરણના ગંભીર બનાવથી ચિંતા સાથે આશ્ચર્ય ફેલાયું છે. ભુજના હોસ્પિટલ રોડ પરથી સાંજે 5 વાગ્યાના સમયગાળામાં 22 વર્ષીય યુવકનું અજાણ્યા ઇસમોએ કારમાં આંતરી અપહરણ કરતાં શહેરમાં ભારે ચકચાર મચી જવા પામી છે.

ભુજના અપનાનગરમાં રહેતા ફરિયાદી કાસમ અબ્દુલ મજીદ લાંગાયના જણાવ્યા અનુસાર શહેરના ધમધમતા હોસ્પિટલ રોડ પર કાજલ ટી હાઉસ પાસેથી ધોળા દિવસે કોઈ અજાણ્યા બેથી ત્રણ શખ્સો બ્લૂ કલરની સ્વિફ્ટ કાર લઈને આવ્યા હતા. જ્યાંથી મિત્રો સાથે ઉભેલા ફરિયાદીના ભાઈ શકીલ અબ્દુલ મજીદ લાંગાયને અગમ્ય કારણોસર કારમાં આંતરી જઈ અપહરણ કર્યું હતું. આ મામલે ફરિયાદી કાસમે બેથી ત્રણ અજ્ઞાત શખ્સો સામે ભુજ બી ડિવિઝન પોલીસ મથકમાં ફરિયાદ દાખલ કરાવી છે. ઘટનાને પગલે પોલીસ પણ દોડતી થઈ હતી.