મહુવાના કુંભારીયા ગામમાં ઝેરી મધમાખીના ડંખથી એક વ્યકતિનું મોત

મહુવા તાલુકાના કુંભારીયા ગામમાં રસ્તા ઉપર વડના ઝાડ ઉપર ઝેરી મધમાખીએ ડંખ મારતા એક વ્યક્તિનું મોત નીપજયું હતું જ્યારે એક વ્યકિતને ગંભીર રીતે ઇજા પહોંચાડતા હોસ્પિટલમાં સારવાર અર્થે ખસેડવામાં આવ્યો હતો. આ ઘટનાથી ગામમાં ભય છવાયો હતો.

મહુવા તાલુકાના કુંભારિયા ગામમાં ગામ કુવા તરફ જતા રસ્તા ઉપર વડના ઝાડ ઉપર ઝેરીમધમાખીનું પોડુ છે. કુંભારીયા ગામના ખેડૂત કુરજીભાઈ વિરજીભાઈ નાકરાણી (ઉ.વ.63) અને વસંતબેન નાકરાણી ઉપર બપોરના સમયમાં અચાનક જ અસંખ્ય ઝેરી મધમાખીએ કુરજીભાઈના મોઢાના ભાગમાં અને ખુલ્લા શરીરના ભાગમાં ઝેરી મધમાખીએ અસંખ્ય ડંખ મારી દેતા કુરજીભાઈનું ઘટના સ્થળે જ મૃત્યુ નીપજયું હતું.વસંતબેન નાકરાણીને 108 મારફતે મહુવા તાલુકા મથકની ખાનગી હોસ્પિટલમાં સારવાર માટે ખસેડાયા હતા.