કેબલ ચોરી કરતી  ટોળકી પકડાય તો છે, પરંતુ  ચોરીના બનાવો અટકતા ન હોવાથી આ ગેંગને ડામવામાં પોલીસને ધારી સફળતા મળતી ન હોવાનું સમજાય છે. સૂત્રો દ્વારા મળતી માહિતી મુજબ નખત્રાણા તાલુકાના રતામિયા સીમ વિસ્તારમાં કેબલ ચોરીનો બનાવ ગત તા. 24ના રાત્રિના 12થી 1.30 વાગ્યાના અરસામાં બન્યો હતો. કે.પી. કંપનીના 220 કે.વી.ના 2090 મીટર વીજતાર તસ્કરો ચોરી  ગયા હતા. ચોરાઉ મત્તાની કિંમત રૂા. 4.18 લાખ આંકવામાં આવી છે. આ ઉપરાંત તસ્કર ટોળકીએ ટાવર નંબર 15.0માં રૂા. 50 હજારનું નુકસાન કરાયું હોવાનું ફરિયાદમાં જણાવાયું છે. ચોરીના બનાવની જાણ થતાં કંપનીના કર્મચારી યાસીનભાઈ ચૌધરીએ નિરોણા પોલીસ મથકમાં ફરિયાદ નોંધાવી હતી. પોલીસે ગુનો નોંધી તપાસ હાથ ધરી હતી. અત્રે ઉલ્લેખનીય છે કે, અગાઉ પણ પશ્ચિમ કચ્છમાં  પાવર બંધ કરીને લાખો રૂપિયાની કિંમતના કેબલની ચોરીના બનાવ પણ બહાર  આવ્યા છે.  ભચાઉ તાલુકાના ચાંદ્રોડા ખોડાસર સીમમાં ચોરીનો બનાવ ગત તા. ત્રીજી ઓગસ્ટથી છ સપ્ટેમ્બર સુધી એક મહિનાના  સમયગાળામાં કોઈ પણ સમયે બન્યો હતો. તસ્કરોએ ચાંદ્રોડા અને ખોડાસર ગામની સીમમાં આવેલી જુદી-જુદી કંપનીની 11 પવનચક્કીને નિશાન  બનાવવામાં આવી હતી. તસ્કરોએ ઓરડીનાં તાળાં તોડીને ચોરીના બનાવને અંજામ  આપ્યો હતો. કોપર વાયર અને કોપરના મુદ્દામાલ સહિત 1.53 લાખની મત્તાની ચોરી કરી હતી. પોલીસે ગુનો નોંધી વધુ તપાસ હાથ ધરી હતી. લાંબા સમયથી કરાતી આ ચોરીમાં કોઈ ચોક્કસ ટોળકીનો   હાથ હોવાની આશંકા વ્યક્ત  કરાઈ રહી છે. પોલીસે ગુનો નોંધી વધુ તપાસ હાથ ધરી હતી.