અંજારના દબડાથી જરૂ તરફ જતાં માર્ગ પર કાર અને બાઇક વચ્ચે સર્જાયેલ અકસ્માતમાં 23 વર્ષીય યુવાનનું મોત

અંજાર ખાતે આવેલ દબડાથી જરૂ તરફ જતાં માર્ગ પર કાર અને બાઇક વચ્ચે સર્જાયેલ અકસ્માતમાં 23 વર્ષીય યુવાનનું મોત નીપજયું હતું. આ બનાવ અંગે પ્રાપ્ત થતી વિગતો મુજબ અંજાર ખાતે આવેલ ચંદ્રનગર ખોખરામાં રહેનાર રમેશ રબારી નામનો યુવાન અંજારમાં ફોનની દુકાનમાં કામ કરતો હતો. ગત તા. 24/10ના હતભાગી યુવાન તથા નવીન ભુરા રબારી તેમની બાઇક લઇને કંપનીના કામથી જરૂ બાજુ જઇ રહ્યા હતા. તે સમયે કારના ચાલકે આ બાઇકને હડફેટમાં લેતાં બંને યુવાનોને ગંભીર પ્રકારની ઇજાઓ પહેંચી હતી.સર્જાયેલ અકસ્માતમાં ગંભીર રીતે ઘાયલ થયેલ આ બંને યુવાનોને સારવાર અર્થે ગાંધીધામની ખાનગી હોસ્પિટલમાં લઇ જવામાં આવેલ હતા. જ્યાં સારવાર વધુ કારગત નીવડે તે પૂર્વે જ રમેશનું મોત નીપજયું હતું, જ્યારે અન્ય યુવાનને સારવાર હેઠળ રાખવામા આવેલ હતો. કાર ચાલક વિરુદ્ધ પોલીસ મથકે ફરિયાદ નોંધાવવામાં આવતા નોંધાવેલ ફરિયાદ અનુસાર પોલીસે આગળની વધુ તપાસ હાથ ધરી છે.