ગાંધીધામ રેલ્વે પોલીસ મથકની સામેથી જ દારૂના જથ્થા સાથે બે શખ્સો ઝડપાયા : મુખ્ય સૂત્રધાર ગાયબ

સૂત્રો જણાવી રહ્યા છે ગાંધીધામ રેલ્વે પોલીસ મથકની સામેથી ગાંધીનગરની સ્ટેટ મોનિટરિંગ સેલની ટીમે દારૂના જથ્થા સાથે બે શખ્સોને ઝડપી પાડેલ છે. આ મામલે વધુમાં પ્રાપ્ત થતી વિગતો મુજબ ગાંધીનગરની સ્ટેટ મોનિટરિંગ સેલની ટીમને ખાનગી રાહે બાતમી મળેલ હતી કે, રેલવે મથકના પ્રાંગણમાં પાર્કિંગ વિસ્તારમાં બે શખ્સો ભાગીદારીમાં દારૂનું વેચાણ કરી રહ્યા છે. મળેલ બાતમીના આધારે કાર્યવાહી હાથ ધરી અને બાતમી હકીકત વાળા સ્થળ પર ઊભેલી કાર પાસે એક્ટિવા પર બેઠેલા બે શખ્સ શંકાસ્પદ જણાતાં તે બંને શખ્સોને પકડી લેવામાં આવેલ હતા. આ શખ્સોની પૂછતાછ કરતાં તે બંને રૂા. 300માં દારૂની ડિલિવરી કરવાની મજૂરી કરતા હોવાનું સામે આવ્યું હતું. બાજુમાં ઉભેલ કારમાં દારૂ હોવાનું જણાતાં આ કારને રેલવે પોલીસ મથકે લઈ જઈ તેની તપાસ કરી તેમાથી દારૂનો જથ્થો કબ્જે કરાયો હતો. જાણવા મળી રહ્યું છે કે આ ગુના કામેના મુખ્ય બે સૂત્રધાર પોલીસની પકડથી દૂર હતા. હાથ ધરવામાં આવેલ કાર્યવાહી દરમ્યાન પોલીસે આ કાર માથી જુદા જુદા પ્રકારની 29 બોટલ જેની કિંમત રૂા. 23,606નો શરાબ કબ્જે કર્યો હતો. પોલીસે તમામ મુદ્દામાલ કબ્જે  કરી આગળની વધુ તપાસ આરંભી છે.