ચાંદલોડીયામાં આઈપીએલ ક્રિકેટ મેચ પર મોબાઈલ પર સટ્ટો લઈ રહેલા ચાર ઇસમોની ક્રાઈમ બ્રાંચે અટક કરી હતી. પોલીસે સટ્ટો રમવા માટેની વેબસાઈટ આઈડી આપનારા ત્રણ ફરાર ઇસમોની શોધ આદરી છે. આ બનાવની વિગત પ્રમાણે ક્રાઈમ બ્રાંચને વિગત મળી હતી કે ચાંદલેડીયામાં વંદેમાતરમ આર્કેડ પાસે ખુલ્લા મેદાનમાં કેટલાક ઇસમો આઈપીએલ ક્રિકેટ મેચ પર સટ્ટો લઈ રહ્યા છે. જેને આધારે પોલીસે રાત્રિના અરસામાં અહીં તપાસ કરતા ચાર ઇસમો મોબાઈલ પર આઈપીએલની સનરાઈઝ હૈદરાબાદ અને રાજસ્થાન રોયલ્સ વચ્ચેની ક્રિકેટ મેચ પર સટ્ટો લઈ રહ્યા હોવાનું બહાર આવ્યું હતું. જેમાં પોલીસે નવા વાડજમાં રહેતા પ્રદીપ આર.મકવાણા, ગોતામાં રહેતા પ્રતિક બી.શાહ, ચાંદલોડીયાના રીકેન બી.પંચાલ અને ગોતાના મેહુલ એસ.બારોટની અટક કરી હતી. તેમની પાસેથી પોલીસે રૂ.૧૪,૦૦૦ની કિંમતના ચાર મોબાઈલ જપ્ત કર્યા હતા. તપાસમાં અટક કરાયેલા ઇસમોએ ક્રિકેટનો સટ્ટો રમવા માટેની વેબસાઈટ આઈ.ડી. તથા બોબડી કાર્ડ કાલુભાઈ સિંધી ધવલ ઉર્ફે ટાઈગર પટેલ અને ગિરીશભાઈ નામના ઈસમ પાસેથી મેળવ્યા હોવાનું બહાર આવ્યું હતું. જેને આધારે પોલીસે આ ત્રણ ઇસમોની શોધ આદરી છે.
