અંજારના સાપેડા નજીક ટ્રકની હડફેટે બે આહીર ભાઈઓના મોત

  અંજાર ખાતે આવેલ સાપેડા નજીક રિવેરા ફાર્મ પાસે બાઈક પર જતાં નિંગાળ ગામના બે યુવાનોને ટ્રકએ હડફેટમાં લેતા બંને યુવાનોના મોત થયા હોવાનું સામે આવ્યું છે. ત્યારે આ બનાવ અંગે વર્તુળોમાંથી પ્રાપ્ત થતી વિગતો મુજબ અંજારના સાપેડા નજીક રિવેરા ફાર્મ પાસે ગત દિવસે સવારના ભાગે આ ગોઝારો અકસ્માત સર્જાયો હતો. નિંગાળમાં રહેનાર શ્યામ આહીર અને પરાસર આહીર નામના યુવાનો બાઈક પર જઈ રહ્યા હતા. તે સમયે માતેલા સાંઢની માફક દોડતી અજાણી ટ્રકે આ યુવાનોની બાઈકને હડફેટમાં લેતા આ ગમખ્વાર અકસ્માત સર્જાયો હતો.  આ બનાવમાં ગંભીર રીતે ઘાયલ થયેલ બંને યુવાનોમાં એકનું ઘટના સ્થળે જ કમકમાટી ભર્યું મોત નીપજયું હતું જ્યારે અન્યને હોસ્પિટલ લઈ જવાતાં ફરજ પરના તબીબે તેને પણ મૃત જાહેર કર્યો હતો. બનાવને પગલે સમગ્ર આહીર સમાજમાં ભારે અરેરાટી સાથે ગમગીની છવાઈ હતી. આ બનાવ અંગે પોલીસે વધુ તપાસ આદરી છે.