બરવાળા ખાતે રાણપુર રોડ ઉપર ૧૯ નંગ બીયરના ટીન સાથે પોલીસે બે શખ્સોની ધરપકડ કરી હતી. જ્યારે એક નાશી ગયો હતો.પોલીસે રૂ.૨૭,૯૦૦ નો મુદામાલ કબ્જે કરી ધોરણસરની તપાસ હાથ ધરી હતી. બરવાળા શહેરના રાણપુર રોડ ઉપર જી.ઇ.બી.સબ સ્ટેશન પાસે ગતરાત્રીના અરસામાં બરવાળા પોલીસના આર.કે.પ્રજાપતિ (પો.સ.ઇ.), રાજદિપસિંહ વાઘેલા, ધવલભાઈ કેવડીયા સહિતનાને મળેલી બાતમીના આધારે વોચ ગોઠવતા રાણપુર બાજુથી આવતી મોટર સાઈકલ નં.જીજે ૨૩ એએમ ૮૫૩૬ ઉભી રખાવી તપાસ કરવામાં આવતા ભારતીય બનાવટના બીયરના ટીન નંગ- ૧૯ કિંમત રૂ.૧,૯૦૦ સાથે બળવંત ઉર્ફ ભુરો બુધાભાઇ દેત્રોજા, રહે.બરવાળા, રાજુ મેપાભાઇ આંબલીયા રહે.ધંધુકાને મોટર સાઈકલ સહિતના કુલ રૂ.૨૭,૯૦૦ ના મુદામાલ સાથે પકડી પાડ્યા હતા. જ્યારે ભગા ભુદરભાઇ કોળી રહે. બરવાળા પોલીસને ચકમો આપી પલાયન થઈ ગયો હતો.
