ગુંદીયાલીના નિર્મળ આકાશમાં ખીલ્યું ‘આપણું આકાશ’: ટેલિસ્કોપની નજરે ગુરુ ગ્રહ જોઈ બાળકો અને વાલીઓ મંત્રમુગ્ધ

વાછરાદાદા મંદિરના સાનિધ્યમાં મોરાવાડી શાળા અને ‘સ્ટારગેઝિંગ ઈન્ડિયા‘ દ્વારા અનોખો ખગોળ ઉત્સવ યોજાયો

ગુંદીયાલી (કચ્છ):

જ્યારે વિજ્ઞાન અને જિજ્ઞાસાનો સંગમ થાય છે ત્યારે બ્રહ્માંડના રહસ્યો ઘરઆંગણે આવી જતા હોય છે. આવો જ એક અદભૂત નજારો ગુંદીયાલીના વાછરાદાદા મંદિરના પ્રાંગણમાં જોવા મળ્યો, જ્યાં શ્રી મોરાવાડી પ્રાથમિક શાળા અને ‘સ્ટારગેઝિંગ ઈન્ડિયા‘ ના સંયુક્ત ઉપક્રમે “આપણું આકાશ” કાર્યક્રમનું ભવ્ય આયોજન કરવામાં આવ્યું હતું. ગ્રામીણ વિસ્તારના ૧૨૫ થી વધુ બાળકો અને વાલીઓએ ટેલિસ્કોપના માધ્યમથી અંતરિક્ષની સફર કરી હતી.

પ્રાચીન જ્ઞાન અને આધુનિક વિજ્ઞાનનો સમન્વય

કાર્યક્રમના પ્રારંભે શાળાના આચાર્ય ગૌરાંગભાઈ સોમૈયાએ ખગોળ પ્રેમીઓનું શાબ્દિક સ્વાગત કરી ટીમનો પરિચય આપ્યો હતો. જાણીતા ખગોળવિદ નરેન્દ્રભાઈ ગોર ‘સાગર‘ દ્વારા અત્યંત રોચક શૈલીમાં તારા, ગ્રહ અને નક્ષત્રોની સમજ આપવામાં આવી હતી. તેમણે આકાશને એક નકશા તરીકે સમજાવતા જણાવ્યું કે, “પ્રાચીન સમયમાં જ્યારે દિશા શોધવાના કોઈ સાધનો નહોતા, ત્યારે આપણા પૂર્વજો ધ્રુવનો તારો અને સપ્તર્ષિ તારામંડળની મદદથી સમુદ્ર અને રણમાં પોતાનું ગંતવ્ય સ્થાન શોધતા હતા.” તેમણે આકાશી પિંડોનું માનવ જીવનમાં મહત્વ પણ સમજાવ્યું હતું.

ટેલિસ્કોપમાં દેખાયો ગ્રહોનો રાજા ‘ગુરુ‘

કાર્યક્રમનું મુખ્ય આકર્ષણ આધુનિક ટેલિસ્કોપ હતું. ખગોળશાસ્ત્રી નિશાંતભાઈ ગોર દ્વારા ઉપસ્થિત સૌને સૌરમંડળના સૌથી મોટા ગ્રહ ગુરુ (Jupiter) ના દર્શન કરાવવામાં આવ્યા હતા. ગુરુની વિશિષ્ટતાઓ જાણીને બાળકોમાં ભારે ઉત્સાહ જોવા મળ્યો હતો. આ તકે સ્ટારગેઝિંગ ઈન્ડિયાની માંડવી ટીમના જિનલ મોતા અને શુચિ માલમે ખગોળ વિજ્ઞાનના ક્ષેત્રમાં રહેલી કારકિર્દીની ઉજ્જવળ તકો વિશે વિદ્યાર્થીઓને માર્ગદર્શન આપ્યું હતું.

પ્રકાશ પ્રદૂષણ સામે જાગૃતિનો સૂર

કાર્યક્રમ દરમિયાન એક મહત્વનો વિષય ‘પ્રકાશ પ્રદૂષણ’ (Light Pollution) પણ ચર્ચાયો હતો. વધતા જતા શહેરીકરણને કારણે હવે સ્વચ્છ આકાશ જોવા મળવું મુશ્કેલ બની રહ્યું છે, ત્યારે ગુંદીયાલી જેવા સ્થાનો જ્યાંથી આકાશ નિર્મળ દેખાય છે, તેની જાળવણી અને સંરક્ષણ થવું જોઈએ તેવો સૂર શ્રોતાઓમાં જોવા મળ્યો હતો.

ગામના અગ્રણીઓની ઉપસ્થિતિમાં સન્માન

આ પ્રસંગે શાળાના SMC અધ્યક્ષ લાખાભાઈ રબારી અને શિક્ષક મહેન્દ્રકુમાર વસાણી દ્વારા નરેન્દ્રભાઈ અને નિશાંતભાઈનું શાલ ઓઢાડી સન્માન કરવામાં આવ્યું હતું. આ કાર્યક્રમમાં રતનાભાઈ રબારી, હીરાભાઈ રબારી, જીવણભાઈ, નથુભાઈ તથા રિજીઓનલ સાયન્સ સેન્ટરના ભરતભાઈ નાનજી પટ્ટણી, સુરેશભાઈ, દિનેશભાઈ અને રાજેશભાઈ પટ્ટણી સહિત મોટી સંખ્યામાં ગ્રામજનો ઉપસ્થિત રહ્યા હતા.

સ્વચ્છ આકાશ નીચે ખગોળીય રહસ્યોને પામવાનો આ નાનકડો પ્રયાસ ગુંદીયાલીના ગ્રામજનો માટે કાયમી સંભારણું બની રહ્યો હતો.