ગાંધીધામમાં ડીઝલની ભારે અછત! પેટ્રોલ પંપો પર લાંબી કતારો

ગાંધીધામ શહેર અને આજુબાજુના ઔદ્યોગિક વિસ્તારમાં છેલ્લા 3 દિવસથી ડીઝલની ભારે અછત વર્તાઈ રહી છે. શહેરના મોટાભાગના પેટ્રોલ પંપો પર “ડીઝલ ખૂટ્યું” ના પાટિયા લાગી ગયા છે જેના કારણે વાહનચાલકોમાં ભારે રોષ જોવા મળી રહ્યો છે.

ટ્રાન્સપોર્ટ વ્યવસાય ઠપ્પ થવાના આરે:
કંડલા-ગાંધીધામ કોમ્પ્લેક્સમાં રોજના હજારો ટ્રકોની અવર-જવર રહે છે. ડીઝલ ન મળવાના કારણે સેંકડો ટ્રકો પંપો પર અને રસ્તા પર ઊભી છે. ટ્રાન્સપોર્ટરોનું કહેવું છે કે માલ સમયસર ન પહોંચતા પેનલ્ટી ભરવી પડે છે અને ડ્રાઈવરો-ક્લીનરો રસ્તા પર રઝળી પડ્યા છે. ખાનગી બસો અને એસટી બસોના ફેરા પણ રદ થવાની શક્યતા છે.

ખેડૂતો અને ઉદ્યોગોની હાલત કફોડી:
ગરમીમાં સિંચાઈ માટે ડીઝલ એન્જિન ચલાવતા ખેડૂતોને ડીઝલ ન મળતા પાક સુકાવાની ભીતિ છે. તો બીજી તરફ નાના-મોટા કારખાનાઓમાં જનરેટર માટે ડીઝલ ન મળતા ઉત્પાદન ખોરવાયું છે.

પંપ સંચાલકો શું કહે છે?
પેટ્રોલ પંપ એસોસિએશનના જણાવ્યા પ્રમાણે કંપનીઓ દ્વારા પુરવઠો ખૂબ ઓછો આપવામાં આવી રહ્યો છે. ડેપોમાંથી જ ડીઝલનો જથ્થો આવતો નથી. ઉપરથી માંગ વધુ હોવાથી 2-3 કલાકમાં જ પંપ ખાલી થઈ જાય છે.

તંત્રની ખાતરી:
પુરવઠા વિભાગના અધિકારીઓએ જણાવ્યું કે કંડલા ડેપો ખાતે ટેકનિકલ ખામીના કારણે સપ્લાય ખોરવાઈ હતી. આજે મોડી રાત સુધીમાં ટેન્કરો આવી જશે અને આવતીકાલ સવારથી પરિસ્થિતિ રાબેતા મુજબ થઈ જશે તેવી ખાતરી આપી છે