ગુજરાતમાં ચોમાસું પકડશે તોફાની ગતિ, ઉત્તર ગુજરાતમાં સાયક્લોનિક સર્ક્યુલેશન સક્રિય, ખેડૂતો માટે રાહતના સમાચાર

ગુજરાતમાં ચોમાસાએ હવે રંગ બતાવવાનું શરૂ કર્યું છે. હવામાન વિભાગના જણાવ્યા મુજબ ઉત્તર ગુજરાતમાં સાયક્લોનિક સર્ક્યુલેશન સક્રિય થતા જુલાઈની શરૂઆતથી જ આખા રાજ્યમાં ભારે વરસાદનું એલર્ટ જાહેર કરવામાં આવ્યું છે. આ સિસ્ટમના કારણે ચોમાસું હવે તોફાની ગતિ પકડશે.

છેલ્લા ઘણા દિવસથી વરસાદની રાહ જોઈ રહેલા ખેડૂતો માટે આ મોટા અને રાહતના સમાચાર છે. ખેતરોમાં વાવણી માટે આ વરસાદ જીવદાન સાબિત થશે. દક્ષિણ ગુજરાત અને સૌરાષ્ટ્રમાં પહેલેથી મેઘમહેર ચાલુ છે અને હવે ઉત્તર ગુજરાતથી લઈને કચ્છ સુધી ધોધમાર વરસાદની શક્યતા છે. ગરમી અને ઉકળાટથી ત્રસ્ત લોકોને પણ આ વરસાદથી મોટી રાહત મળશે.

તંત્ર દ્વારા નીચાણવાળા વિસ્તારોમાં રહેતા લોકોને સાવચેત રહેવા સૂચના આપવામાં આવી છે. નદી નાળા છલકાવાની શક્યતા હોવાથી તંત્ર એલર્ટ મોડ પર છે. આગામી એક સપ્તાહ રાજ્ય માટે વરસાદની દ્રષ્ટિએ મહત્વનું રહેશે. ખેડૂતો હવે ખેતીકામમાં જોડાઈ જશે અને ચોમાસુ પાકની આશા બંધાશે.