ઉપગ્ર્રહ તસવીરોમાં ગાઢ વાદળો

દેશભરમાં ચોમાસું સંપૂર્ણપણે સક્રિય થઈ ગયું છે. 19મી જુલાઈના  ઈસરો દ્વારા લેવામાં આવેલી સેટેલાઈટ તસવીરોમાં દેશભરમાં એક મોટો ફેરફાર જોવા મળ્યો છે, જેમાં, ભારતના લગભગ બે તૃતીયાંશ વિસ્તારને ગાઢ વાદળોએ ઘેરી લીધો છે. મળતી માહિતી મુજબ જમ્મુ – કાશ્મીરથી શરૂ કરીને ગંગાના મેદાની વિસ્તારો,  બિહાર,  પશ્ચિમ બંગાળ અને ઉત્તર – પૂર્વીય રાજ્યો સુધી ચોમાસાંનાં વાદળો ફેલાયેલાં છે, જેને પગલે હવામાન વિભાગે આગામી સમયમાં ભારે વરસાદ અને વાવાઝોડાંની શક્યતા વ્યક્ત કરી છે. સેટેલાઈટ વિશ્લેષણ અનુસાર દેશમાં સૌથી વધુ ગીચ વાદળો ઉત્તરીય મેદાનો એટલે કે પંજાબ, ઉત્તરપ્રદેશ, બિહાર અને પશ્ચિમ બંગાળ પર જોવા મળી રહ્યા છે. આ ઉપરાંત, અરબી સમુદ્રમાંથી આવતા ભેજયુક્ત પવનોને કારણે દક્ષિણ દ્વીપકલ્પમાં પણ વાદળોની લાંબી પટ્ટીઓ સર્જાઈ છે.