વરસાદી સિસ્ટમ ઉત્તર ગુજરાત તરફ ખસીઃ અમદાવાદ સહિત 11 જિલ્લાઓ માટે રેડ એલર્ટ, પૂર્વ કચ્છમાં પણ ઓરેન્જ એલર્ટ
ગુજરાતમાં સક્રિય લો પ્રેશર એરિયા (LPA) ઉત્તર-મધ્ય ગુજરાત તરફ પશ્ચિમ દિશામાં આગળ વધી રહ્યું હોવાથી આગામી બે દિવસ દરમિયાન અતિભારે વરસાદનો પટ્ટો પણ ઉત્તર તરફ ખસે તેવી આગાહી કરવામાં આવી છે. તેના પગલે હવામાન નિષ્ણાતોએ શુક્રવાર અને શનિવાર માટે અનેક જિલ્લાઓમાં ચેતવણીનું સ્તર વધાર્યું છે.
રેડ એલર્ટ હવે દાહોદ, મહિસાગર, પંચમહાલ, અરવલ્લી, ખેડા, આણંદ, બનાસકાંઠા, સાબરકાંઠા, ગાંધીનગર, અમદાવાદ અને મહેસાણા જિલ્લાઓ માટે જાહેર કરવામાં આવ્યું છે. આ વિસ્તારોમાં ભારેથી અતિભારે વરસાદ સાથે અનેક સ્થળોએ પૂર જેવી સ્થિતિ, નીચાણવાળા વિસ્તારોમાં પાણી ભરાવા, માર્ગ વ્યવહાર ખોરવાવા અને જનજીવન પર વ્યાપક અસર થવાની શક્યતા છે. આગામી બે દિવસ દરમિયાન કેટલાક વિસ્તારોમાં કુલ 600થી 800 મીમી સુધી વરસાદ નોંધાઈ શકે છે.
ઓરેન્જ એલર્ટ સુરેન્દ્રનગર, પાટણ, થરાદ, મોરબી, રાજકોટ અને પૂર્વ કચ્છ માટે જાહેર કરવામાં આવ્યું છે. અહીં ભારેથી અતિભારે વરસાદ અને કેટલાક વિસ્તારોમાં અત્યંત ભારે વરસાદની શક્યતા છે, જેના કારણે સ્થાનિક સ્તરે પાણી ભરાવા અને અવરજવરમાં વિક્ષેપ સર્જાઈ શકે છે. આ વિસ્તારોમાં કુલ 250થી 400 મીમી વરસાદ નોંધાવાની સંભાવના વ્યક્ત કરવામાં આવી છે.
દક્ષિણ ગુજરાતના સુરત, વલસાડ, નવસારી, ડાંગ, તાપી, નર્મદા, ભરૂચ, વડોદરા અને છોટાઉદેપુર જિલ્લાઓમાં પણ શુક્રવાર સુધી ભારે વરસાદ ચાલુ રહેવાની શક્યતા છે, જોકે શનિવારથી તેની તીવ્રતામાં નોંધપાત્ર ઘટાડો થવાની આગાહી છે.
બીજી તરફ, પશ્ચિમ કચ્છ અને સૌરાષ્ટ્રના મોટાભાગના વિસ્તારોમાં હળવાથી મધ્યમ વરસાદી ઝાપટાં પડવાની શક્યતા છે.
