ઈરાન-ઓમાનના હોર્મુઝ કરાર : ટેક્સ વસૂલશે ?
અમેરિકા અને ઈરાનનાં ઘર્ષણ મધ્યે આખી દુનિયામાં ઊર્જા સંકટ સર્જાવા માટે નિમિત્ત બનેલા હોર્મુઝ જળમાર્ગનાં બન્ને કિનારે આવેલા ઈરાન અને ઓમાન વચ્ચે એક નવી સમજૂતી થઈ છે. આ સમજૂતીની સત્તાવાર વિગતો હજી સુધી બહાર આવી નથી પરંતુ હવે બન્ને દેશ મળીને આ જળમાર્ગનો ઉપયોગ કરવા માટે ટેક્સની વસૂલાત શરૂ કરે તેવી શક્યતા દેખાઈ રહી છે. પ્રાપ્ત અહેવાલો મુજબ હોર્મુઝમાંથી બહાર જતાં કોમર્શિયલ જહાજોને ઈરાન સંભાળશે. તેને નિયંત્રિત કરશે. બીજીતરફ ઓમાન આ જહાજોની દેખરેખ અને તેનાં પરિચાલનને સંભાળશે. બન્ને દેશ સાથે મળીને આનાં માટે કોઈ ટોલ ઉઘરાવશે કે નહીં તે હજી સુધી અસ્પષ્ટ છે. જો કે અમેરિકા સાથે યુદ્ધ વચ્ચે ઈરાન સતત હોર્મુઝમાં ટેક્સની વસૂલાત શરૂ કરવાની ચિમકીઓ ઉચ્ચારતું રહે છે. સામે છેડે અમેરિકા આ આંતરરાષ્ટ્રીય જળમાર્ગ બધા માટે નિ:શુલ્ક રહે તેનો આગ્રહ રાખતું આવ્યું છે. જો કે ઈરાન આમાં પાછળ હટવા માટે તૈયાર નથી. દરમિયાન અમેરિકાના રાષ્ટ્રપતિ ડોનાલ્ડ ટ્રમ્પે હોર્મુઝ ઉપર અમેરિકાનાં નિયંત્રણના દાવા સાથે ઈરાન ઉપર પલટવાર કરતાં જણાવ્યું હતું કે, ઈરાનને પછાડીને અમેરિકા હોર્મુઝને પોતાનું ક્ષેત્ર ઘોષિત કરી નાખશે. તો ઈરાનના નેતા ઈબ્રાહિમ અજીઝીએ કટાક્ષ કરતાં જણાવ્યું હતું કે, હોર્મુઝ ઉપર દાવો કરવાના બદલે ટ્રમ્પે પહેલા પોતાની સુરક્ષાની ચિંતા કરવાની જરૂર છે. ક્યાંક ફરીથી તેમને ફૂડ ટ્રકમાં છૂપાવાની નોબત ન આવી જાય તેની કાળજી રાખવી જોઈએ.
