ભારતીય પેડલર હવે માત્ર સ્પર્ધકો નથી, અમે મેડલના દાવેદાર છીએઃ માનવ ઠક્કર

ગાંધીધામ, તા.16: ગુજરાતના સ્ટાર ટેબલ ટેનિસ ખેલાડી માનવ ઠક્કર માટે આગામી એશિયન ગેમ્સ એક મહત્વપૂર્ણ તબક્કો બની રહેશે. 26 વર્ષીય પેડલરે અગાઉ બે એશિયન ગેમ્સ અને પેરિસ ઓલિમ્પિક્સમાં ભારતનું પ્રતિનિધિત્વ કર્યું છે અને હવે તે આ ખંડીય રમતોના મહાકૂંભમાં સિંગલ્સમાં પદાર્પણ કરશે. વિશ્વના શ્રેષ્ઠ ખેલાડીઓ સામે રમવાનો વ્યાપક અનુભવ અને ભારતીય ટેબલ ટેનિસની તાકાત પર વધતા વિશ્વાસ સાથે માનવ ઠક્કરને ખાતરી છે કે ભારત વિવિધ સ્પર્ધાઓમાં મેડલ જીતીને પરત ફરી શકે છે.ગુજરાતના આ પેડલરનું માનવું છે કે દેશની ટેબલ ટેનિસ ટીમમાં મોટો બદલાવ આવ્યો છે. માત્ર ભાગ લેનારા ખેલાડીઓમાંથી ભારતીય પેડલર્સ હવે મેડલના ખરા દાવેદાર તરીકે જોવામાં આવે છે. માનવ ઠક્કર પુરુષ ડબલ્સમાં માનુષ શાહ સાથે જોડી બનાવશે, તેણે પોતાના સિંગલ્સ પદાર્પણ, ભારતની મેડલની શક્યતાઓ, ટેબલ ટેનિસ ક્ષેત્રે ગુજરાતના ઉભરતા વર્ચસ્વ અને GSTTA તથા ગુજરાત સરકાર તરફથી મળેલા સહયોગ વિશે વાત કરી હતી.

મુખ્ય અંશ:

પ્રશ્નઃ તમારી ત્રીજી એશિયન ગેમ્સને લઈને ઉત્સાહિત છો?

ઉત્તરઃ હા, આ મારી ત્રીજી એશિયન ગેમ્સ હશે અને ઓલિમ્પિક્સ સહિત એકંદરે મારી ચોથી મોટી મલ્ટિ સ્પોર્ટ ઇવેન્ટ હશે. બે એશિયન ગેમ્સ પછી આ પહેલીવાર હશે જ્યારે હું સિંગલ્સ રમીશ. હું જાણતો હતો કે મને આ તક મળશે કેમ કે 2024માં પેરિસ ઓલિમ્પિક્સ પછી  હું ભારતનો નંબર 2 ખેલાડી બન્યો હતો, અને ટોચના બે ખેલાડીઓને એશિયન ગેમ્સમાં સિંગલ્સ રમવાની તક મળે છે.જ્યારે હું ઓલિમ્પિક્સની તૈયારી કરી રહ્યો હતો ત્યારે સિંગલ્સ રમવું એ મારા લક્ષ્યાંકમાંથી એક હતું, પરંતુ કમનસીબે  હું તે ચોક્કસ સમયે તે માટે પૂરતો સક્ષમ ન હતો. તેથી, હું હવે સિંગલ્સ રમવા માટે ખરેખર ઉત્સુક છું.

પ્રશ્નઃ  શું તમારા પ્રથમ સિંગલ્સ પદાર્પણ પહેલાં તમને થોડી ગભરામણ કે અસ્વસ્થતા અનુભવાય છે?

ઉત્તરઃ ના, ખરેખર એવું નથી. હું છમાંથી પાંચ WTT ચેમ્પિયન્સ ટુર્નામેન્ટ રમી ચૂક્યો છું, જેમાં વિશ્વના ટોચના 32 ખેલાડીઓને પ્રવેશ મળે છે. તેથી મને વિશ્વના શ્રેષ્ઠ ખેલાડીઓ સામે રમવાનો સારો અનુભવ મળ્યો છે. તે અનુભવ મને સિંગલ્સ ઇવેન્ટમાં પ્રવેશતા આત્મવિશ્વાસ આપે છે.

પ્રશ્નઃ તો, તમે સિંગલ્સ ઇવેન્ટમાં પ્રવેશતી વખતે તમારી જાતને ખૂબ ઊંચા સ્તરે આંકી રહ્યા છો?

ઉત્તરઃ હા. સિંગલ્સ ચોક્કસપણે તમામ ટુર્નામેન્ટમાં સૌથી મુશ્કેલ છે પરંતુ મને સિંગલ્સ રમવાની મજા આવે છે કેમ કે મેં મારી કારકિર્દી દરમિયાન એ જ કર્યું છે. એશિયન ગેમ્સમાં સિંગલ્સ રમવાની તક મળવી એ એક લક્ષ્ય પ્રાપ્ત કરવા જેવું છે, પરંતુ આ માત્ર ભાગ લેવા પૂરતું નથી. જો આપણે વધુ એક મેડલ જીતી શકીએ  તો તે શ્રેષ્ઠ રહેશે. ભારતે 2018માં મેડલ જીત્યો હતો, તેથી જો આપણે ટીમ, ડબલ્સ કે સિંગલ્સ  કોઈ પણ સ્પર્ધામાં વધુ એક મેડલ જીતી શકીએ, તો તે એક મોટી સિદ્ધિ લેખાશે.

પ્રશ્નઃભારતીય ટીમ પાસેથી તમારી મેડલની શું આશાઓ છે?

ઉત્તરઃ  ભારત હવે એવો દેશ નથી રહ્યો જે માત્ર ભાગ લે છે. પછી તે પુરુષ કે મહિલા ટીમ હોય, સિંગલ્સ હોય, ડબલ્સ હોય કે મિક્સ્ડ ડબલ્સ હોય, ભારત હવે મેડલનું મજબૂત દાવેદાર છે.ભારતીય ટેબલ ટેનિસ પ્રત્યેના દૃષ્ટિકોણમાં મોટો બદલાવ આવ્યો છે. મેડલના અન્ય દાવેદારો હવે અમને એક પડકાર કે જોખમ તરીકે જૂએ છે. આ એક મોટો ફેરફાર છે  અને તે દર્શાવે છે કે ભારતીય ટેબલ ટેનિસ કેટલું આગળ વધ્યું છે.

પ્રશ્નઃ પુરુષ ડબલ્સ પર આવીએ તો તમે અને માનુષ એશિયન ગેમ્સમાં બીજા ક્રમાંકિત હશો અને ભારત માટે મેડલની મજબૂત આશા બની રહેશો.

ઉત્તરઃ માનુષ અને હું હાલમાં વર્લ્ડ નંબર 3 છીએ અને એશિયન ગેમ્સમાં ઊંચો ક્રમાંક મળવો એ આપણા માટે ફાયદાકારક છે. આપણે ટોચના ચારમાં પહોંચવામાં સક્ષમ હોવા જોઈએ. આપણે શરૂઆતના રાઉન્ડમાં સૌથી વધુ રેન્કિંગ ધરાવતી જોડીઓને હરાવવી જરૂરી નથી. આપણે નીચું રેન્કિંગ ધરાવતી જોડીઓ સામે સતત સારું પ્રદર્શન કરવું પડશે. અને, સૌથી મહત્વનું, તેમની સામે ભૂલો કરવાનું ટાળવું પડશે.

પ્રશ્નઃ ગુજરાતના ત્રણ ખેલાડીઓ  તમે, હરમિત અને માનુષ  હવે નિયમિતપણે ભારતનું પ્રતિનિધિત્વ કરી રહ્યા છો. વાસ્તવમાં પુરુષ ટીમના પાંચમાંથી ત્રણ ખેલાડીઓ ગુજરાતના છે.

ઉત્તરઃ ભારતનું પ્રતિનિધિત્વ કરતા ગુજરાતના ત્રણ ખેલાડીઓને જોવા એ ચોક્કસપણે ગર્વની ક્ષણ છે. અગાઉ, હું ભારતીય ટીમમાં હરમિત દેસાઈને જ ગુજરાતના એક માત્ર ખેલાડી તરીકે જોતો હતો. તેને પણ શરૂઆતમાં પોતાનું સ્થાન બનાવવા માટે સંઘર્ષ કરવો પડ્યો હતો અને સખત મહેનત કરવી પડી હતી.ધીમે ધીમે પરિસ્થિતિ બદલાઈ. પછી અમે આગળ આવવા લાગ્યા, અને હવે ગુજરાતના ત્રણ ખેલાડીઓ ભારતીય ટીમનો હિસ્સો છે. માનુષે પણ જુનિયર સ્તરે ઉત્કૃષ્ટ પ્રદર્શન કર્યું છે અને હવે સિનિયર સ્તરે પણ સ્થાપિત થયો છે. આ વર્ષે તેણે નેશનલ ચેમ્પિયનશિપ પણ જીતી હતી.આ દર્શાવે છે કે ટેબલ ટેનિસમાં ગુજરાતે કેટલો વિકાસ કર્યો છે. આપણે એક માપદંડ નક્કી કરવા માંગીએ છીએ અને માત્ર ભારતીય ટીમનો હિસ્સો બનીને નહીં, પરંતુ દેશ માટે મેડલ જીતીને અને પરિણામો આપીને પ્રેરક બનવા માગીએ છીએ.

પ્રશ્નઃ જીએસટીટીએ અને ગુજરાત સરકાર તરફથી મળેલા સમર્થનને તમે કેવી રીતે વર્ણવશો?

ઉત્તરઃ જીએસટીટીએ ના સહયોગથી, મને તાલીમ અને ટુર્નામેન્ટ માટે વિદેશ પ્રવાસ કરવાની અને વિદેશી કોચ સાથે કામ કરવાની તકો મળી. હું ગુજરાત સરકારની શક્તિદૂત યોજનાનો પણ એક ભાગ રહ્યો છું અને એ ખૂબ પ્રોત્સાહક છે કે આપણે ટૂંક સમયમાં જ શક્તિદૂત 2.0 જોઈશું.

જીએસટીટીએ એ પણ કેટલાક મહત્વપૂર્ણ પગલાં લીધા છે. તેમણે ચાઇનીઝ કોચ સાથે સુરતમાં વર્લ્ડ ક્લાસ હાઇ પર્ફોર્મન્સ એકેડેમી શરૂ કરી છે. આ એકેડેમી માત્ર એલિટ ખેલાડીઓ માટે જ નથી. રાજ્ય સ્તરના ઘણા ખેલાડીઓને પણ વિદેશી તાલીમ, સ્પર્ધાઓ અને કોચિંગ માટેની તકો મળી છે, જેમાં તેમના ફંડિંગ અને અન્ય જરૂરિયાતોનું ધ્યાન રાખવામાં આવ્યું છે.મને લાગે છે કે 

જીએસટીટીએ એ ભારતની સૌથી સક્રિય એસોસિયેશનો પૈકીનું એક છે. જે પ્રકારનું સમર્થન અને તકો પૂરી પાડવામાં આવી રહી છે, તે ગુજરાતના ખેલાડીઓને વિકસાવવામાં અને ઉચ્ચ સ્તરે સ્પર્ધા કરવામાં મદદ કરી રહી છે.

માનવ ઠક્કરના ફોટા આ સાથે સામેલ છે.