અંજાર તાલુકાના રતનાલથી સાપેડા વચ્ચે નશાબાં ધૂત જઇ રહેલા કાર ચાલકે નિંગાળથી ભુજ તરફ જઇ રહેલા બાઇક ચાલકને અડફેટે લેતાં બાઇક સવાર 25 વર્ષીય એક યુવાનનું મોત નિપજ્યું હતું તો એક ગંભીર રીતે ઇજાગ્રસ્ત થયો હતો. અકસ્માત થતાં નશામાં ધૂત કાર ચાલકને ગામ લોકોએ અંજાર પોલીસને સોંપ્યો હતો. જો કે મોડી રાત સુધી પોલીસે કાર ચાલકનું નામ મળ્યું ન હોવાનું રટણ ચાલુ રાખ્યું હતું.આ બાબતે પ્રાપ્ત વિગતો મુજબ, મોડી સાંજે બનેલા આ ગમખ્વાર અકસ્માતમાં નશામાં ધૂત જીજે-12-ડીએ-9904 નંબરની ક્રેટા કાર ચાલકે સાપેડા રતનાલ વચ્ચે નિંગાળથી નિકળેલા બાઇક સવારને અડફેટે લીધા હતા જેમાં નિંગાળ રહેતા 25 વર્ષીય ફકીરમામદ ઉર્ફે અસલમ રમજુભાઇ કેવરને ગંભીર ઇજા પહોંચતાં ઘટનાસ્થળે તેનું મોત નિપજ્યું હતું તો તેની સાથે બાઇક પર સવાર આદમ ઉમરભાઇ કેવરને પણ ગંભીર ઇજાઓ પહોંચી છે જેની હાલત પણ નાજુક હોવાનું પોલીસ સૂત્રોએ જણાવ્યું હતું. સૂત્રોમાંથી મળેલી વિગતો મુજબ નશામાં ધુત કાર ચાલકને આસપાસના ગામ લોકોએ અંજાર પોલીસને સોંપ્યો હતો પણ મોડી રાત સુધી પોલીસ મથકે આ જીવલેણ અકસ્માત સર્જનાર કાર ચાલકનું નામ જાણવા મળ્યું ન હોવાનું રટણ ચાલુ રાખ્યું હતું. આરટીઓના કારના નંબર ઉપરથી કાર ચાલકનું નામ હરસુખ હોવાનું જાણવા મળ્યું હતું પણ મોડી રાત સુધી પોલીસે કાર ચાલકનું નામ આપવાનું ટાળ્યું હતું. હાલ એક યુવાનના મોત અને એક યુવાનની ગંભીર હાલતને કારણે નિંગાળમાં માતમ છવાયો છે.
