ફલેટ ખરીદવાના નામે ગજબની ગાઠીયાગીરીનો કિસ્સો સામે આવ્યો છે. રાજકોટની એલઆઇસી કચેરીના વિકાસ અધિકારીએ પંચાયત ચોકમાં આવેલો પોતાનો ફલેટ વેંચવા અખબારમાં આપેલી જાહેર ખબર મારફત બે ગઠીયાએ ફલેટ જોઇ ૧ કરોડ ૩૦ લાખમાં સોદો નક્કી કરી સબ રજીસ્ટ્રાર કચેરીએ સાટાકરાર કરાવતી વખતે ૧ કરોડ ૩૦ લાખ રકમ લખેલુ સાટાકરાર બતાવી બાદમાં ગોલમાલ કરી સહીઓ કરાવતી વખતે માત્ર ૩૦ લાખની કિંમત લખેલા સાટાખતમાં સહીઓ કરાવીલઇ ૧ લાખની સુથીનો ચેક આપી એ પછી હવે આ સોદો કરવો નથી, જો સાટાકરાર રદ કરાવવું હોય તો ૩૫ લાખ આપવા પડશે તેમ કહી ઠગાઇ કરતાં ચકચાર મચી ગઇ છે. પોલીસે જુનાગઢ અને રાજકોટના બે શખ્સોને દબોચી લેવા તજવીજ આદરી છે. એસઓજીના પીએસઆઇ એમ. એસ. અંસારીએ એસીપી જે. એચ. સરવૈયાની રાહબરીમાં આ મામલે યુનિવર્સિટી પોલીસ મથકમાં ગુનો દાખલ કરાવ્યો છે. યુનિવર્સિટી રોડ પર પંચાયત ચોક પાસે હેવલોક એપાર્ટમેન્ટમાં આઠમા માળે રહેતાં અને એલઆઇસીની મુખ્ય કચેરીમાં વિકાસ અધિકારી તરીકે નોકરી કરતાં કિરીટભાઇ હસમુખભાઇ પટેલ (ઉ.વ.૫૪)ની ફરિયાદ પરથી રાજકોટના યુવરાજસિંહ ચુડાસમા અને જુનાગઢના કાલરીયાભાઇ વિરૂધ્ધ આઇપીસી ૪૦૬, ૪૨૦, ૧૨૦ (બી) મુજબ કાવત્રુ ઘડી ગોલમાલ કરી એકને બદલે બીજી રકમ લખી ફલેટનું સાટાખત કરાવડાવી પાછળથી સોદો રદ કરી નાંખી જો સાટાખત રદ કરવું હોય તો ૩૫ લાખ આપવા પડશે તેમ કહી ઠગાઇ કર્યાનો ગુનો નોંધાયો છે.
