કલોલ શહેરમાં 3 દુકાનમાંથી 1.18 લાખની મત્તાની ચોરી

કલોલ શહેરમાં સ્ટેશન રોડ પર આવેલી 3 દુકાનોમાં બાકોરા પાડીને રોકડ, સીસીટીવીનાં ડીવીઆર, ડ્રાયફુડ તથા મસાલા સહિત કુલ રૂ.1.18 લાખની કિંમતની મત્તાની ચોરી જતા ચકચાર મચી જવા પામી છે. સવારના અરસામાં વેપારીઓએ દુકાન ખોલ્યા બાદ બનાવ સામે આવતા પોલીસ દોડતી થઇ ગઇ હતી. પોલીસે ફરીયાદ દાખલ કરીને આસપાસનાં સીસીટીવી ફુટેજ તપાસવાનું શરૂ કર્યુ છે. આ બનાવથી નગરના અન્ય વેપારીઓમાં પણ ફફડાટ વ્યાપી ગયો છે. કલોલની અંબિકાનગર સોસાયટીમાં રહેતા સ્ટેશન રોડ પર ખમાર ભવનની સામે મેર્સસ ખમાર મણીલાલ લાલદાસ નામની દુકાન ધરાવતા વૈભવકુમાર કિરીટભાઇ ખમારે કલોલ શહેર પોલીસ મથકમાં લખાવેલી ફરિયાદ પ્રમાણે સવારના અરસામાં દુકાન ખોલીને સાંજના અરસામાં વસ્તી કરે છે.  સાંજના અરસામાં માણસો દુકાને વસ્તી કરીને ગયા બાદ બીજા દિવસે સવારના અરસામાં  દુકાન ખોલતા પાછળનાં ભાગે બાકોરૂ જોવા મળ્યુ હતુ. ત્યારબાદ આ અંગે દુકાનમાં તપાસ કરતા લોખંડની તિજોરી પણ તુટેલી હતી અને રૂ.60 હજારની રોકડની ચોરી થઈ હતી. તે જ રીતે પાસેની ઉર્વેશ હિતેશકુમાર પટેલની દુકાનમાંથી પણ તિજોરીમાંથી રૂ.45 હજારની રોકડ, સીસીટીવીનું ડીવીઆર બાકોરૂ પાડીને ચોરી લીધુ હતુ. તેમની જમણી બાજુએ આવેલી નટવરલાલ ડાહ્યાભાઇ પટેલની નટરાજ કિરાણા સ્ટોરમાંથી પણ બાકોરૂ પાડીને ડ્રાયફુટ તથા મસાલા સહિતની રૂ.10 હજારની ચિજોની ચોરી થઈ હતી. કુલ મળીને રૂ.1.18 લાખની મત્તાની ચોરીની ફરીયાદનાં આધારે પોલીસે કાર્યવાહી હાથ ધરી છે.