થરાદમાં ટ્રકે પાછળથી ટક્કર મારતાં બાઇકસવાર યુવકનું મૃત્યુ નીપજયું

વાવના ચારડીયાવાસના બે મિત્રો બાઇક લઇને સાંજના અરસામાં થરાદ આવી રહ્યા હતા. ત્યારે થરાદની સરકારી હોસ્પિટલ પાસે પાછળથી ટ્રકના ચાલકે ટક્કર મારતાં બાઇક ચાલક બન્ને મિત્રો નીચે પટકાતાં એક યુવકના પગ ઉપર ટ્રકનું ટાયર ફરી વળતાં મૃત્યુ નિપજ્યું હતું. થરાદ પોલીસે ટ્રક ચાલક સામે ગુનો નોંધીને વધુ તજવીજ હાથ ધરી હતી. વાવના ચારડીયાવાસના બે મિત્રો ભુપતભાઇ શંકરભાઇ બારોટ અને હઠાભાઇ પસાભાઇ પરમાર જીજે-જેબી-2753 નંબરનું બાઇક લઇને સાંજના અરસામાં થરાદ આવી રહ્યા હતા. આ વખતે થરાદની સરકારી હોસ્પિટલ પાસે આવતાં પાછળ આવી રહેલી આરજે 07 જીએ 7460 નંબરની ટ્રકના ચાલકે ટક્કર મારતાં બંન્ને નીચે પટકાયા હતા.જે પૈકી બાઇક ચાલક ભુપતભાઇ રોડની સાઇડમાં અને હઠાભાઇ રોડ પર પડતાં તેમના પર ટ્રકનું ખાલી સાઇડનું આગળનું ટાયર આવી જતાં પગ ઉપર ટ્રકનું ટાયર ફરી વળ્યું હતો. આથી લોહી નિકળતી હાલતમાં ટ્રક નીચેથી કાઢીને 108માં સરકારી હોસ્પિટલમાં સારવાર માટે ખસેડાયો હતો. જ્યાંથી વધુ સારવાર માટે પાલનપુર સિવિલ અને ત્યાંથી મહેસાણા ખસેડાયો હતો.જો કે રસ્તામાં ઉંઝા પાસે હઠાભાઇનું કરૂણ અને કમકમાટીભર્યું મૃત્યુ નિપજ્યું હતું. જેમને મહેસાણાની બાઇબ્રાટ હોસ્પિટલના તબીબે મૃત જાહેર કર્યો હતો. પોલીસે ભુપતભાઇની ફરિયાદના આધારે 20 વર્ષીય યુવકનું મૃત્યુ નિપજાવનાર ટ્રકચાલક સામે કાર્યવાહી હાથ ધરી હતી.