સાયલાના ગરાંભડી ગામની સીમમાં વિદેશી દારૂ, બિયરનો જથ્થો પકડાયો

સાયલાના ગરાંભડી ગામની સીમ જમીનમાં વિદેશી દારૂ હોવાની બાતમીના આધારે ધજાળા પોલીસે દરોડો પાડ્યો હતો. જેમાં બાવળની આડમાં 224 વિદેશી દારૂની તેમજ 72 નંગ બીયર પકડી પાડ્યા હતા. કુલ રૂ.97,200ના મુદ્દામાલ સાથે ગરાંભડી ગામના યુવાન સામે ગુનો દાખલ કર્યો હતો. સાયલાના ધજાળા પોલીસ કર્મીઓ નડાળાથી લીંબાળા તરફ વોરંટની બજવણી કરવા જતા હતા. આ દરમિયાન ગરાંભડી ગામના રામજીભાઇ વિભાભાઇ સરવૈયાએ ગાડા મારગના સીમ જમીનમાં વિદેશી દારૂ ઉતાર્યો હોવાની બાતમી મળી હતી. આથી ધજાળાના પોલીસ કર્મી વાલજીભાઇ સતાભાઇ ભુવા, હિતેષભાઇ રામજીભાઇ, ઉદયભાઇ જોરૂભાઇ અને કુલદીપસિંહ, ખોડાભાઇએ તપાસ કરતા ગરાંભડી ગામની સીમ વોકળા પાસેના બાવળની આડમાં છુપાયેલો વિદેશી દારૂ હાથ લાગ્યો હતો. જેમાં અલગ અલગ બ્રાંડની રૂ.84,000ની કિંમતની 224 વિદેશી દારૂની બોટલો તેમજ રૂ.7,200 ની કિંમતના 72 નંગ બિયરના મળી કુલ રૂ.97,200નો મુદ્દામાલ કબ્જે કરવામાં આવ્યો હતો. આ બનાવમાં ગરાંભડી ગામના ગરાંભડી ગામના રામજીભાઇ સરવૈયા સામે ગુનો દાખલ કરીને પકડી લેવા પોલીસે કાર્યવાહી હાથ ધરી હતી.