વિદ્યાનગરમાં ડેપ્યુટી સેકશન ઓફિસર અને ડેપ્યુટી મામલતદારની પરીક્ષા દરમિયાન ઉમેદવાર મોબાઇલ સાથે ઝડપાયો
વિદ્યાનગરની આરપીટીપી હાઈસ્કૂલમાં રવિવારના રોજ ડેપ્યુટી સેકશન ઓફિસર અને ડેપ્યુટી મામલતદારની પરીક્ષા દરમિયાન ઉમેદવાર મોબાઇલ સાથે ઝડપાતા તેની સામે કાર્યવાહી હાથ ધરવામાં આવી હતી.
આણંદ – વિદ્યાનગરમાં રવિવારના રોજ ડેપ્યુટી સેકશન ઓફિસર અને ડેપ્યુટી મામલતદારની પરીક્ષાનું આયોજન કરવામાં આવ્યું હતું. આ પરીક્ષામાં આરપીટીપી હાઈસ્કૂલને કેન્દ્ર ફાળવવામાં આવ્યું હતું. આ પરીક્ષાના પગલે શાળાના આચાર્ય મહેન્દ્રકુમાર અંબાલાલ પટેલ ફરજ પર હાજર હતાં તથા સુપરવાઇઝર તરીકે આદિત્ય પી. મોદીને યુનીટ-1 બ્લોક નં.5માં જવાબદારી સોંપાઇ હતી.
આ દરમિયાનમાં પરીક્ષાર્થી મકવાણા કિરણકુમાર ગોરધનભાઈ (રહે.અશોક સ્ટ્રીટ, સોજિત્રા)ના ખિસ્સામાંથી મોબાઇલ મળી આવ્યો હતો. આ અંગે આયોગના પ્રતિનિધિને જાણ કરવામાં આવી હતી. અંતે ગુજરાત જાહેર સેવા આયોગની માર્ગદર્શિકા મુજબ વિદ્યાર્થીને વર્ગખંડમાં રોકી રખાયો હતો અને પરીક્ષા પૂર્ણ થતાં તેને પોલીસને હવાલે કરાયો હતો. આ મામલે પોલીસે જાહેરનામાના ભંગ બદલ ગુનો દાખલ કર્યો હતો.
