અમદાવાદમાં સામાન લઈ જવા બાબતે પિતા પુત્ર વચ્ચે ચાલતા ઝઘડામાં નાના ભાઈએ મોટા ભાઈને ચપ્પું માર્યું
કૃષ્ણનગરમાં ઘરમાં મૂકેલો સામાન લઈ જવા અંગે પિતા-પુત્ર વચ્ચે ચાલતા ઝઘડામાં નાના ભાઈએ ઉશ્કેરાઈ જઈને મોટા ભાઇને છાતીમાં ચપ્પું મારી દેતાં કૃષ્ણનગર પોલીસે ફરિયાદ દાખલ કરી છે. ઠક્કરનગરની ચામુંડાની ચાલીમાં રહેતા જયકિશન મકવાણાએ પિતા લક્ષ્મણભાઈ અને ભાઈ જયદીપ સામે કૃષ્ણનગર પોલીસ સ્ટેશનમાં દાખલ કરાવેલ ફરિયાદ અનુસાર નવરાત્રીમાં પિતાએ મકાન ખાલી કરવાનું કહેતા જયકિશન એ જ ચાલીમાં ભાડાનું મકાન લઇ દશેરાના દિવસે પરિવાર સાથે ત્યાં રહેવા જતો રહ્યો હતો.
શુક્રવારે રાત્રે જયકિશનના પિતાએ ઘરમાં રાખેલો તેનો સામાન લઈ જવા કહેતા આ અંગે ઝઘડો થયો હતો, જેમાં બોલાચાલી ઉગ્ર થતાં નાના ભાઈ જયદીપે જયકિશનને છાતીમાં ચપ્પું મારી દીધું હતું.
