માધાપર હાઇવે પર ત્રણ કિલો ગાંજા સાથે ધાવડાના બે ઇસમો ઝડપાયા
માધાપર હાઇવે પરથી 3 કિલો ગાંજા સાથે નખત્રાણાના ધાવડા ગામના બે ઇસમો ઝડપાયા છે. ઇડરથી મગફળી ભરીને આવતા ટ્રકમાં ગાંજા સાથે દારૂ અને બિયરના બોટલ મળી આવ્યા છે.
મળતી વિગતો અનુસાર પોલીસે બાતમીને આધારે ભુજ માધાપર હાઇવે પરથી ધાવડા ગામના દેવીસિંહ ભચલસિંહ સોઢા તથા અનિલકુમાર વિઠ્ઠલદાસ સાધુને ટ્રક નંબર GJ12BX 6390 ને ખોજા કબ્રસ્તાન સામે રોક્યા હતા. ઈડર એપીએમસી માંથી મગફળીની 500 બોરી ભરી ભુજ જીઆઇડીસી મધ્યે લઈ આવતા ટ્રકની તપાસ કરી હતી.
તપાસ દરમિયાન ટ્રકની કેબિન માંથી રૂપિયા 30 હજારનો 3 કિલો ગાંજો મળી આવ્યો હતો. પોલીસે ટ્રકની વધુ તપાસ કરતા રોયલસ્ટેગવ્હિસ્કીની બે બોટલ અને કિંગફિશર બિયરના 3 ટીન મળી આવ્યા હતા.પોલીસે બંને આરોપીઓ પાસેથી મગફળી ભરેલ ટ્રક સહિત રૂપિયા 22.34 લાખનો મુદ્દામાલ જપ્ત કર્યો હતો.જેના પગલે ધાવડાના બંને ઇસમો સામે માધાપર પોલીસે એનડીપીએસ એક્ટ તેમજ પ્રોહીબિસન એક્ટ અનુસાર કાયદેસરની કાર્યવાહી કરી આગળની તપાસ પધ્ધર પોલીસને સોંપાઇ છે.
ગાંજા સાથે પકડાયેલા ધાવડાના બંને ઇસમો ટ્રાન્સપોટેશનનો ધંધો કરે છે.ગત 26.10 ના આરોપીઓ ઓરિસ્સા ગયા હતા.જ્યાં એક અજાણ્યા શખ્સ પાસેથી ગાંજો ખરીદી લાવ્યા હતા.
હાલ વિધાનસભાની ચૂંટણીની તારીખ જાહેર થયા પછી આચારસંહિતા અમલવારીના કારણે ઠેર ઠેર ચેકપોસ્ટ શરૂ કરાઈ છે.પરંતુ બે દિવસમાં એસઓજીની ટીમે 2.80 લાખનું એમડી ડ્રગ્સ અને 3 કિલો ગાંજો ઝડપાતા ચેકપોસ્ટ ચેકીંગ પર પણ સવાલો ઉઠી રહ્યા છે.3 કિલો ગાંજા સાથે પકડાયેલા ધાવડાના આરોપી અનિલકુમાર સામે પૂર્વે એ ડિવિઝન પોલીસ મથકમાં પીધેલી હાલતમાં ગાડી ચલાવવાનો ગુનો દાખલ કરાયો છે.
