ગાંધીધામના જૂની સુંદરપુરી વિસ્તારમાં પોતાની પત્નીને બળજબરીપૂર્વક ફિનાઈલ પીવડાવી હત્યાના પ્રકરણમાં શખ્સને આજીવન કેદનો ધાક બેસાડતો ચુકાદો આપવામાં આવ્યો હતો. ગાંધીધામના જૂની સુંદરપુરી વિસ્તારમાં આઠ વર્ષ પહેલાં આ ચકચારી બનાવ બન્યો હતો. આરોપી રમેશ ડાયા ધુવા નામનો શખ્સ પોતાની પત્ની સાથે વારંવાર ઘરકામ બાબતે ઝઘડો કરતો હતો, ગત તા. 4/4/2016ના આ શખ્સે હંસાબેન (ઉ.વ.32)નું નાક દબાવી બળજબરીપૂર્વક તેમને ફિનાઈલ પીવડાવી દીધું હતું, જેમાં આ મહિલાને સારવાર અર્થે લઈ જવાયા હતા. સારવાર દરમ્યાન મહિલાએ છેલ્લા શ્વાસ લેતાં આ બનાવ હત્યામાં પલટાયો હતો, જે અંગે મહિલાના પિતાએ એ-ડિવિઝન પોલીસ મથકે ફરિયાદ નોંધાવી હતી. પોલીસ દ્વારા આરોપીની ધરપકડ કરાઈ તેના વિરુદ્ધ ચાર્જશીટ રજૂ કરવામાં આવી હતી. આ કેસ અહીંના ચોથા અધિક સેશન્સ જજની કોર્ટમાં ચાલી ગયો હતો, જ્યાં બન્ને પક્ષોને સાંભળ્યા બાદ ન્યાયાધીશ એ. એમ. મેમણે સરકાર તરફના સાહેદો, દસ્તાવેજી આધાર-પુરાવાઓને ગ્રાહ્ય રાખી આરોપીને તકસીરવાન ઠેરવ્યો હતો અને હત્યાની કલમો હેઠળ  રમેશ ધુવાને આજીવન કેદની સજા તથા રૂા. 5000નો દંડ ફટકાર્યો હતો તેમજ દંડની રકમ ન ભરે તો વધુ ત્રણ મહિનાની કેદનો ચુકાદો આપ્યો હતો. આ કેસમાં સરકાર તરફે સરકારી વકીલ મહેન્દ્રસિંહ જાડેજાએ હાજર રહી દલીલો કરી હત હતી.