જંબુસરના મંગણાદ નજીક ઊભેલી ટ્રક પાછળ ઇકો કાર ઘૂસી જતાં સાતના મોત
જબુંસરના લોકો શુકલતીર્થ જાત્રાએ જતા સમયે મંગણાદ નજીક હાઈવે પર ઉભેલી ટ્રકની પાછળ ઈકો કાર ઘૂસી જતાં અકસ્માત સર્જાયો હતો.જેમાં બાળકો, મહિલા અને પુરૂષો સહિત 10 લોકોમાંથી 6 લોકોના મોત નિપજ્યા હતા.જ્યારે ચાર લોકો ગંભીર હાલતમાં પહેલા જબુંસર અને ત્યાંથી વડોદરા ખસેડવામાં આવ્યા હતાં. જ્યાં વધુ એક મહિલાનું મોત નીપજ્યું હતું.જેથી મૃત્યુ આંક સાત પર પહોંચ્યો છે.
જબુંસર તાલુકાના વેડચ, પાંચકડા અને ટંકારી બંદરના સગા સંબંધીઓએ ભરૂચના શુકલતીર્થ ગામે મેળામાં જવાનું નક્કી કર્યું હતું.તેઓ કુલ 10 લોકો ગતરોજ રાત્રીના ઇક્કોકાર લઈને ભરૂચ તરફ જવા નીકળ્યા હતા.તેઓ જબુંસર-આમોદ માર્ગ પરથી પસાર થઈ રહ્યા તે સમયે તેઓને મંગણાદ નજીક હાઈવે પર એક ટ્રક ચાલકની ટ્રકનું પંચર પડ્યું હોય તેઓ ગાડીને ઉભી રાખી ટાયર બદલતા હતા.તે સમયે જબુંસરના લોકોની ઈકો કાર ધડાકાભેર ઉભેલી ટ્રકની પાછળ ભટકાતા ગમખ્વાર અકસ્માત સર્જાયો હતો. અકસ્માતમાં ઈકો કારમાં સવાર લોકોની ચીસોથી આસપાસના લોકો પણ તાત્કાલિક ઘટના સ્થળ પર દોડી આવ્યા હતા.જોકે અકસ્માત એટલો ભયાનક હતો કે,જેમાં ઈકો કારમાં સવાર લોકો ઈકો કારમાં ફસાઈ ગયા હતાં.
અકસ્માતની જાણ થતા જ જબુંસરના પીઆઈ એ.વી. પાનમિયા તેમના સ્ટાફ સાથે તાત્કાલિક ઘટના સ્થળ પર પહોંચી સ્થાનિકોની સાથે રાહત કામગીરી હાથ ધરી હતી. જેમાં કારમાં ફસાયેલા લોકોને કારને પરાઈ વડે અને પતરા ચીરીને લોકોને બહાર કાઢ્યા હતા.જેમાં પાંચ લોકોના તો સ્થળ પર જ મોત નિપજ્યા હતા જ્યારે અન્ય લોકોને તાત્કાલિક સારવાર અર્થે 108 એમ્બ્યુલન્સ મારફતે જબુંસરની રેફરલ હોસ્પિટલમાં ખસેડવામાં આવ્યા હતાં.આ ઘટનાની જાણ થતા જંબુસરના ધારાસભ્ય ડી.કે.સ્વામી અને ડીવાયએસપી પી.એન. ચૌધરી પણ તાત્કાલિક હોસ્પિટલમાં દોડી આવ્યા હતાં. હોસ્પિટલમાં સારવારમાં એક અન્ય વ્યક્તિનું મોત થતા મૃત્યુઆંક 6 પર પહોંચ્યો હતો. જોકે અન્ય વ્યક્તિઓને વધુ સારવારની જરૂર હોય વડોદરા હોસ્પિટલમાં રીફર કરાયા હતાં.જેમાં પણ એક મહિલાનું મોત થતાં કુલ 7 લોકો મોતને ભેટ્યા છે.આ મામલે જબુંસર પોલીસે ત્રણ મહિલા, બે પુરૂષ અને બે બાળકોના મોત અંગે અકસ્માતનો ગુનો નોંધીને વધુ તપાસ હાથ ધરી છે.જબુંસર નગરમાં એક સાથે સાત લોકોના મોતથી શોકનો માહોલ છવાયો છે.
અકસ્માતમાં મૃત્યુ પામેલાના નામ
કીર્તિકાબેન અર્જુનસિંહ ગોહિલ રહે,અલાદાર, તા. વાગરા,
સપનાબેન જયદેવ ગોહિલ
જયદેવ ગોવિંદભાઇ ગોહિલ બંને રહે,પાચકડા
હંસા અરવિંદ જાદવ, રહે. વેડચ
સંધ્યા અરવિંદ જાદવ, રહે વેડચ
વિવેકકુમાર ગણપત પરમાર, રહે. ટંકારી બંદર
મિતલ ગણપતભાઇ, રહે. ટંકારી બંદર
અકસ્માતમાં ઈજાગ્રસ્ત થયેલાના નામ
નીધી ગણપત, રહે.ટંકારી બંદર
ગણપત રમેશભાઈ, રહે. ટંકારી બંદર
અરવિંદ રયજીભાઈ, રહે. વેડચ
રિપોર્ટર:- કેતન મહેતા, ભરૂચ
