કચ્છમાં “નેશનલ સ્પોર્ટસ ડે” કાર્યક્રમની ઉજવણી અંતર્ગત તા. ૨૯ થી ૩૧ ઓગસ્ટ દરમિયાન વિવિધ સ્પોર્ટસ ઈવેન્ટ યોજાશે
કચ્છમાં જિલ્લા કલેક્ટરશ્રી આનંદ પટેલના અધ્યક્ષસ્થાને આગામી “નેશનલ સ્પોર્ટસ ડે” કાર્યક્રમની ઉજવણીને લઈને બેઠકનું આયોજન કરવામાં આવ્યું હતું. રમત ગમત, યુવા અને સાંસ્કૃતિક વિભાગ દ્વારા “નેશનલ સ્પોર્ટસ ડે” કાર્યક્રમની ઉજવણી અંતર્ગત તા. ૨૯ થી ૩૧ ઓગસ્ટ દરમિયાન વિવિધ પ્રવૃતિઓનું આયોજન કરવામાં આવશે.
રાજ્ય સરકાર દ્વારા મેજર ધ્યાનચંદના જન્મદિન-‘નેશનલ સ્પોર્ટસ ડે’ દર વર્ષે તા. ૨૯મી ઓગસ્ટને મહાન હોકી ખેલાડી મેજર ધ્યાનચંદની જન્મજયંતિના સન્માનમાં આ દિવસને “નેશનલ સ્પોર્ટસ ડે” તરીકે મનાવવવામાં આવે છે. આ વર્ષે “એક ઘંટા ખેલ કે મેદાન મે !” થીમ પર સમગ્ર રાજ્ય સહિત કચ્છમાં ત્રણ દિવસ સુધી વિવિધ સ્પોર્ટસ ઈવેન્ટ યોજાશે.
જે અન્વયે તા.૨૯મી ઓગસ્ટના દિવસે કચ્છ જિલ્લામાં આવેલી તમામ શાળાઓ, કોલેજ, યુનિવર્સિટી અને અન્ય સંસ્થાઓમાં ‘ફીટ ઈન્ડિયા’ના શપથ સાથે મેજર ધ્યાનચંદને શ્રદ્ધાંજલિ આપવામાં આવશે. વિવિધ શાળા, કોલેજ, યુનિવર્સિટી અને અન્ય સંસ્થાઓમાં “એક ઘંટા ખેલ કે મેદાન મે !” થીમ પર ડીબેટ્સ, સેમિનાર, ફિટનેસ અંગે વાર્તાલાપ જેવી પ્રવૃતિઓનું આયોજન કરવામાં આવશે. આ કાર્યક્રમમાં ઓલિમ્પિક અને પેરા ઓલિમ્પિક મૂલ્યોનું એકીકરણ કરવામાં આવશે.
બીજા દિવસની ઉજવણી અન્વયે તા. ૩૦મી ઓગસ્ટે પોલીસ હેડ ક્વાર્ટર ખાતે વિવિધ સ્પર્ધાનું આયોજન કરાશે. જેમાં પોલીસ વિભાગની ટીમ સાથે અન્ય સરકારી વિભાગો અને સ્કૂલોની ટીમ ભાગ લેશે. આ ઉજવણીના ત્રીજા દિવસ એટલે કે તા. ૩૧મી ઓગસ્ટના રોજ ગાંધીધામ ખાતે મહાનગરપાલિકા કક્ષાએ ‘સાયકલ ઓન સન્ડે’નું આયોજન કરવામાં આવશે. ગાંધીધામ મહાનગરપાલિકા દ્વારા આ ઈવેન્ટમાં નાગરિકોને સહભાગી બનાવવામાં આવશે. આ ઉપરાંત, કચ્છની તમામ નગરપાલિકાઓમાં વોર્ડવાઈઝ રમતોનું આયોજન કરાશે. આ ત્રિ-દિવસીય ઉજવણીમાં ગ્રામ્યકક્ષાએથી લઈને જિલ્લાકક્ષા સુધીના રમત-ગમતના વિવિધ કાર્યક્રમો યોજાશે.
આજરોજ કચ્છ કલેક્ટરશ્રીએ “નેશનલ સ્પોર્ટસ ડે” તા. ૨૯ થી ૩૧ ઓગસ્ટની ત્રિ-દિવસીય ઉજવણીમાં નાગરિકોને સહભાગી બનાવવા તેમજ ગ્રામ્યકક્ષાએથી લઈને જિલ્લાકક્ષાની સ્પર્ધાનું સુચારું આયોજન કરવા સૂચન કર્યું હતું. કલેક્ટરશ્રીએ કબડ્ડી, રસ્સાખેંચ, વોલીબોલ, હોકી જેવી રમતોને સમાવિષ્ટ કરીને આયોજન કરવા અંગે માર્ગદર્શન આપ્યું હતું.
