અમદાવાદમાં કાગડાપીઠ વિસ્તારમાં ચાલી રહેલી ગેંગવોરમાં યુવકનું અપહરણ કરી ઘાતકી હત્યા

શહેરમાં પોલીસનો ડર જ રહ્યો ન હોય તેમ ગુનેગારો બેફામ બન્યા હોય તેમ લાગી રહ્યું છે. દેશના સુરક્ષિત શહેર પૈકીના એક અમદાવાદ શહેરના કાગડાપીઠ વિસ્તારમાં ચાલી રહેલી ગેંગવોરમાં યુવકનું અપહરણ કરીને તેની ઘાતકી હત્યા કરવામાં આવી છે. રોડની વચ્ચે જ 10થી વધુ લોકો ધારિયા જેવા ઘાતક હથિયારો સાથે એક યુવક પર તૂટી પડ્યા હતા. થોડા સમય પહેલાં યુવકના ભાઈ પર જ્યાં હુમલો થયો હતો, તે જ સ્થળે યુવકની જાહેરમાં હત્યા કરવામાં આવી હતી. લોહીયાળ ગેંગવોરના કારણે સમગ્ર વિસ્તારમાં ભયનો માહોલ ફેલાયો છે. આ ઘટનાની જાણ થતાં જ પોલીસ કાફલો તાત્કાલિક ઘટનાસ્થળે પહોંચી ગયો હતો અને આ મામલે ગુનો નોંધીને ત્રણ આરોપી ઝડપી વધુ તપાસ હાથ ધરી હતી.

કાગડાપીઠમાં ભાઈની જ્યા હત્યા કરવાની કોશિષ કરી ત્યાંજ યુવકનું ઢીમ ઢાળી દઈશું તેવું વિચારીને માથાભારે તત્વોએ ગેંગ સાથે મળીને હત્યાકાંડને અંજામ આપ્યો છે. માથાભારે તત્વએ ગેંગ સાથે મળીને યુવકનું અપહરણ કરીને તેના પર ઘાતક હથિયારો વડે હુમલો કરીને મોતને ઘાટ ઉતારી દીધો છે. છેલ્લા એક અઠવાડિયાથી એક જ સમાજના લોકો વચ્ચે લોહીયાણ ગેંગવોર ચાલી રહી છે.

શહેરકોટડા વિસ્તારમાં રવિશંકર મહારાજ ઔડાના મકાનમાં રહેતા અક્ષય પટણીએ કાગડાપીઠ પોલીસ સ્ટેશનમાં સતીષ ઉર્ફે સતીયો પટણી, વિશાલ દંતાણી, મહેશ ઉર્ફે કટ્ટો, બાવો, સાજન, રાજ ઉર્ફે સેસુ સહિત 6 થી વધુ લોકો વિરૂદ્ધ અપહરણ તેમજ હત્યાની ફરિયાદ કરી છે.અક્ષય સંયુક્ત પરિવારમાં રહે છે અને નોકરી કરીને ગુજરાન ચલાવે છે. અક્ષયનો એક ભાઈ રવિ ટીઆરબી જવાન છે, જ્યારે નાનો ભાઈ નીતિન કાગડાપીઠ ખાતે સંકુલ કોમ્પલેક્ષમાં નોકરી કરે છે. ગઈકાલે(22 ઓગસ્ટે) અક્ષયના મોબાઈલ પર તેની બહેનનો ફોન આવ્યો હતો કે, નિતીનનું અપહરણ કરીને રીક્ષામાં કેટલાક તત્વો લઈ ગયા છે. અક્ષય તરત જ કાગડાપીઠ પોલીસ સ્ટેશન પાસે પહોચી ગયો હતો. જ્યાં તેને જાણવા મળ્યું કે, નિતીનને મેઘાણીનગરમાં આવેલા પટણીનગરમાં લઈ ગયા છે, ત્યા કેટલાક લોકો તેને મારમારી રહ્યા છે. બાદમાં અક્ષયને જાણવા મળ્યું કે નિતીન પર સતિષ, વિશાલ, મહેશ, બાવો, સાજન, રાજ સહિતના લોકોએ ધારીયા, પાઈપ, દંડા વડે હુમલો કર્યો છે.નિતીનને સિવિલ હોસ્પિટલમાં સારવાર અર્થે ખસેડવામાં આવ્યો હતો. અક્ષય અને તેનો પરિવાર હોસ્પિટલ પહોચ્યા ત્યારે નિતીન લોહીથી લથબથ હાલતમાં સ્ટ્રેચર પર પડ્યો હતો. નિતીનનું ટૂંકી સારવાર દરમિયાન મોત થયુ હતું.ઉલ્લેખનીય છે કે, પટણી સમાજમાં છેલ્લા ઘણા દિવસોથી ગેંગવોર ચાલી રહી છે, જેમાં કાલે લોહીયાણ ખેલ ખેલાયો છે. બે દિવસ પહેલા સતીષ પટણીના ભાઈની દિપક ઉર્ફે હુક્કા પર ધારીયા વડે હુમલો કરીને લોહીલુહાણ કરી દીધો હતો. ગઈકાલે સતીષના ભાઈને હોસ્પિટલથી ડીસ્ચાર્જ કરી દેતા તેણે હુમલામાં સંડોવાયેલા નિતીનની તેજ જગ્યા પર હત્યા કરીને ફરાર થઈ ગયા છે.વધુમાં જાણવા મળ્યું છે કે, નિતીન અને વિપુલ એક જ જગ્યાએ નોકરી કરે છે, જ્યા થોડા દિવસ પહેલા વિપુલ પર ઘાતકી હુમલો કરવામાં આવ્યો હતો. બે વર્ષ પહેલા વિપુલને રાહુલ, સતીષ, આકાશ અને પકા પટણી સાથે બબાલ થઈ હતી.
થોડા દિવસ પહેલા વિપુલ તેના ઘરની પાસે ઉભો હતો, ત્યારે સતીષ, રાહુલ, આકાશ અને પકો રીક્ષા અને બાઈક લઈને આવ્યા હતા. વિપુલ કઈ વિચારે તે પહેલા સતીષ સહિતના લોકોએ તેના પર ધારીયા તેમજ છરીઓ વડે હુમલો કરી દીધો હતો. હત્યા કરવાના ઈરાદે આવેલા તત્વોએ વિપુલ પર હુમલો કરીને નાસી ગયા હતા.વિપુલને સારવાર માટે હોસ્પિટલમા ખસેડવામાં આવ્યો હતો. વિપુલ પર હુમલો થયો તેનો બદલો લેવા પરિવારના લોકોએ ધમપછાડા કરી રહ્યા હતા. ત્રણ દિવસ પહેલા વિપુલના પિતા સુરેશ, ચીંટુ, પકો, નિતીન સહિતના લોકો હથીયાર લઈને સતીષ અને તેની ગેંગ પર હુમલો કરવા માટે ફરી રહ્યા હતા.

સતીષ તો ના મળ્યો પરંતુ તેનો ભાઈ દિપક ઉર્ફે હુક્કો હાથમાં આવી ગયો હતો. દીપક ઉર્ફે હુક્કાને તમામ લોકોએ ધારીયા, છરીથી હુમલો કરીને ફરાર થઈ ગયા હતા. દીપક પર હુમલા કેસમાં મેઘાણીનગર પોલીસે નિતીન, સુરેશ સહિતના લોકો પર હત્યાની કોશિષની ફરિયાદ નોંધી હતી.દીપક જીવન મરણ વચ્ચે ઝોલા ખાઈ રહ્યો હતો, ત્યારે સતીષે પણ બદલો લેવા માટેનો પ્લાન કરી દીધો હતો. ગઈકાલે સતીષે નિતીનનું તેની નોકરીની જગ્યાએથી અપહરણ કર્યુ હતું અને બાદમાં જ્યા દિપક પર હુમલો થયો હતો. ત્યા તેને ધારીયા તેમજ હથિયારથી મારમાર્યો હતો.

રીપોર્ટ બાય:અશ્વિન લીંબાચીયા, અમદાવાદ.